गोंदिया : कोरोनाच्या दुसऱ्या लाटेचे भयंकर परिणाम आपण सर्वांनी भोगले आहेत. श्रावण, भाद्रपद गौरी गणपती सणामुळे बाजारपेठेत अनियंत्रित गर्दी उसळली आहे. जागतिक आरोग्य संघटनेने तिसऱ्या कोरोना लाटेचा इशारा दिलेला आहे. तिकडे केरळमध्ये ओणम या सणासुदीला गर्दी केल्याने पुन्हा कोरोना रुग्णांमध्ये वाढ झालेली दिसून आलेली आहे. त्यामुळे कोरोनापासून सरंक्षण पाहिजे असेल तर दुसऱ्या डोससाठी विलंब करू नका असे केटीएस रुग्णालयातील निवासी वैद्यकीय अधिकारी डॉ. सुवर्णा हुबेकर यांनी कळविले आहे.
शहरात लसीकरणाच्या प्रमाणात दुसरा डोस घेणाऱ्यांची संख्या कमीच आहे. त्यामुळे प्रत्येक वाॅर्ड व प्रभागाप्रमाणे लसीकरण याद्या पडताळणी करून ज्यांचा दुसरा डोस काही कारणामुळे राहिला असेल त्यांनी त्वरित जवळच्या लसीकरण केंद्रावर जाऊन घेण्याची गरज आहे. जिल्ह्यात कोव्हिशिल्ड व कोव्हॅक्सिन या दोन्ही लसींचा मुबलक प्रमाणात साठा उपलब्ध आहे. तसेच दररोज कुंभारे नगर, केटीएस रुग्णालय, मरारटोली, गोविंदपूर व राजस्थानी स्कूलमध्ये लसीकरण सत्र सकाळी १० ते सायंकाळी ५ वाजेपर्यंत सुरू आहे. यात ऑन द स्पॉट नोंदणीची सोय असल्याने लवकरात लवकर लसीकरण करून घेता येते. त्यामुळे १८ वर्षांवरील वयोगटातील सर्व नागरिकांचे १०० टक्के लसीकरण येत्या काही दिवसांत पूर्ण करून घ्यायचे आहे. त्यासाठी सर्वांनी सहकार्य करावे, असे आवाहन डॉ. हुबेकर यांनी केले आहे.