केशोरी : येथील सार्वजनिक गणेश उत्सव मंडळातर्फे ‘एक गाव एक गणपती’ हा उपक्रम गेल्या तीस वर्षांपासून राबविण्यात येत आहे. हे मंडळ दरवर्षी गणेश उत्सव साजरा करून अनेक शाळांच्या सहभागातून विविध सांस्कृतिक कार्यक्रम आयोजित करण्यात या गणेश मंडळाचा हातखंडा आहे.
कोरोना महामारीची पार्श्वभूमी लक्षात घेऊन ठाणेदार संदीप इंगळे यांनी आयोजित केलेल्या गाव शांतता समितीच्या बैठकीतून दिलेल्या सूचनांचे पालन करीत यावर्षी सांस्कृतिक कार्यक्रम घेण्यास बगल देऊन आरोग्य विषयक कार्यक्रमावर भर देण्यात आला. त्या संदर्भाने स्थानिक प्राथमिक आरोग्य केंद्र आणि सार्वजनिक गणेश मंडळाच्या संयुक्त विद्यमाने वैद्यकीय अधिकारी डॉ. पिंकू मंडल यांच्या मार्गदर्शनात लसीकरण पथक प्रभारी राखी हाडगे, गेडाम, हिना वावरे यांच्या आरोग्य पथकाने मंडळाच्या सभामंडपात माजी जिल्हा परिषद बांधकाम सभापती प्रकाश पाटील गहाणे यांच्या प्रमुख उपस्थितीत कोरोना प्रतिबंधात्मक लसीकरण शिबिर पार पाडण्यात आले. शिबिरासाठी नगारिकांनी प्रचंड प्रतिसाद दिल्याने ३५० जणांना कोव्हॅक्सीन लसीचे डोस देऊन लसीकरण शिबिर यशस्वी करण्यात आले. अध्यक्ष एकनाथ राणे, धनंजय नेवारे, विलास बोरकर, दुर्गेश बोरकर, प्रवीण नेवारे, किशोर नेवारे, शुभम खोब्रागडे, ईश्वर नेवारे यांनी सहकार्य केले.