देवरी : रस्त्याच्या मधोमध उभा असलेला जनावरांचा कळप, दुकानदारांना दररोज त्रस्त करणारी जनावरे, ग्राहकांच्या पिशव्यांमध्ये तोंड घालणारी आणि वेळप्रसंगी टक्कर खेळणारी मोकाट जनावरे देवरी शहरात नित्याची बाब झाली आहे. वाहतुकीस अडथळा ठरणाऱ्या या जनावरांमुळे अनेकांना अपघाताला सामोरे जावे लागले.
शहरातील चिचगड रोड, शेडेपार रोड आणि बाजार चौक रस्त्यावर ठिकठिकाणी जनावरांचे कळप दिसून येतात. काही जनावरे तर चक्क रस्त्याच्या मधोमध ठिय्या देऊन बसतात. बसस्थानक परिसर, विश्रामगृह, तहसील, पंचायत समिती या भागात नागरिकांची दररोज वर्दळ असते. त्या ठिकाणीही मोकाट जनावरे दिसून येतात. या जनावरांना हाकलण्याचा प्रयत्न केला तर, अंगावर चालून येण्याची भीती असते.
मोकाट जनावरांमुळे विक्रेतेही त्रस्त झाले आहेत. रस्त्यावर हातगाडीवर भाजीपाला विकणाऱ्यांना तर या जनावरांचा त्रास होतो. शहरातील मोकाट जनावरांचा बंदोबस्त करण्याची मागणी नागरिकांनी नगरपंचायतकडे केली. मात्र त्याची अद्यापही दखल घेण्यात आली नाही. त्यामुळे समस्या कायम आहे.
........
जनावरांच्या मालकांवर कारवाई करा
देवरी शहराच्या रस्त्यावर मोकाट जनावरे बिनधास्तपणे फिरताना दिसतात. याचा वाहतुकीला अडथळा निर्माण होत असतो. वर्दळीच्या मार्गावर या जनावरांच्या ठिय्या राहत असल्याने अनेकदा अपघात सुद्धा घडले आहेत. मात्र या जनावरांचा बंदोबस्त केला जात नाही. त्यांच्या मालकांचा शोध घेऊन नगर पंचायतने कारवाई करण्याची मागणी शहरवासीयांनी नगर पंचायतकडे केली आहे.