नरेश रहिले
गोंदिया : वाटसरू किंवा फिरायला जाणाऱ्या महिलांचे दागिने ओढून घेऊन जाऊ नये, म्हणून गोंदियाच्या पोलीस अधीक्षकांनी मागील पाच ते सात वर्षांत ज्या ठिकाणी चैन स्नॅचिंग, घरफोडी, दरोडा, जबरी चोरीच्या घटना घडल्या, अशी गोंदिया शहरातील २२ ठिकाणे शोधून काढली. या ठिकाणांवर फिक्स पाइंट बसवून त्या ठिकाणी २४ तास पोलिसांचा बंदोबस्त नेमला. त्यामुळे सन २०२१ या वर्षात चैन स्नॅचिंगच्या एकही घटना घडल्या नाहीत, अशी माहिती पोलीस अधीक्षक विश्व पानसरे यांनी दिली आहे.
गोंदिया शहर रामनगर, गोंदिया शहर व गोंदिया या दोन पोलीस ठाण्याच्या हद्दीत येतो. गोंदिया शहरात चैन स्नॅचिंगच्या घटना सन २०१९ मध्ये १ व २०२० मध्ये १ असे गुन्हे घडले आहेत, परंतु या घटनांना लगाम लावण्यासाठी पोलीस अधीक्षक विश्व पानसरे यांनी गोंदिया शहर व रामनगर पोलीस ठाण्याच्या हद्दीत मागील पाच-सात वर्षांत २२ ठिकाणे घरफोडी, दरोडा, जबरी चोरी यांसारखे मालमत्ताविषयीचे वारंवार गुन्हे घडत असलेल्या भागात २२ ठिकाणे निश्चित करून त्या ठिकाणी नियमितपणे फिक्स पॉइंट लावण्यात आले आहेत. अशाच प्रकारे गोंदिया जिल्ह्यातील सर्व पोलीस ठाण्याच्या हद्दीत वारंवार गुन्हे घडत असलेल्या भागात ठिकाण निश्चित करून, त्या ठिकाणी नियमितपणे फिक्स पॉइंट लावण्यात आले आहेत. प्रत्येक पोलीस स्टेशनमध्ये सतत पोलीस अंमलदार डयुटीवर नेमण्यात येत आहेत. गोंदिया शहरात मार्शल पेट्रोलिंग, क्रमांक ११२ मोबाइल व्हॅन, पोलीस स्टेशनकडून पेंट्रोलिंग सतत ठेवण्यात येत आहे. या घटनांवर पूर्णपणे प्रतिबंध घालण्यात आला आहे. महिलांच्या मनातही कोणतीही भीती नसून ते निर्भयपणे आपली नियमित दिनचर्या पार पाडीत आहेत. यामुळे सन २०२१ मध्ये आतापर्यंत चैन स्नॅचिंगचा गुन्हा घडला नाही.
................
कोट
गोंदिया शहराच्या २२ ठिकाणी फिक्स पाइंट तयार केले आहे. या फिक्स पाइंटवर २४ तास पोलिसांचा बंदोबस्त असतो. मागील घडलेल्या घटनांचा अभ्यास करून, हे कार्य केल्यामुळे सन २०२१ या वर्षात आतापर्यंत चैन स्नॅचिंगची एकही घटना घडली नाही. नागरिकांना भयमुक्त वातावरण देण्यासाठी गोंदिया पोलीस सज्ज आहे.
- विश्व पानसरे, पोलीस अधीक्षक गोंदिया.