गोंदिया: सोशल मीडियाच्या माध्यमातून सायबर गुन्हे घडण्याचे प्रकार समोर येत आहे. आता तर सीम कार्ड व्हेरिफिकेशनच्या नावाखाली संदेश पाठवून आर्थिक फसवणुकीच्या घटना घडत आहेत. यापासून नागरिकांनी जागृत राहण्याचा सल्ला जिल्हा पोलिसांकडून दिला जात आहे.
कोरोनाचा प्रादुर्भाव मोठ्या प्रमाणात होत असून या काळात फसवणुकीच्या घटनांमध्येही वाढ झाली आहे. याबाबत तक्रारी मोठ्या प्रमाणात प्राप्त होत आहेत. सायबर कायद्यानुसार हा गुन्हा असून सोशल मीडियाचा वापर काळजीपूर्वक करावा, अशी बाब सातत्याने आवाहनाच्या रूपाने करण्यात येते. फेसबुक, व्हाॅट्सॲप, ट्विटर, सोशल मीडियासह मोबाईल कंपन्यांची नावे घेऊन फसवणूक करीत असल्याचे प्रकार वाढले आहेत. ‘सीम कार्ड खराब झाले आहे, ब्लॉक झाले आहे, ते आपण बदलून घ्यावे आपल्याला आलेला ओटीपी आम्हाला पाठवावा,’ असा संदेश पाठवून दिलेल्या क्रमांकावर संपर्क करावा, असे म्हटले जाते. यासंदर्भात एखाद्या ग्राहकाने संपर्क साधल्यास त्याला लवकरच फसविले जाते. सीम व्हेरिफिकेशनच्या नावाखाली सन २०१९ ते २०२१ या कालावधीत सदर प्रकार जास्त प्रमाणात घडले आहेत. यासंदर्भात नागरिकांनी जागृत राहावे असे आवाहन पोलिसांकडून करण्यात आले आहे.
............................
ॲप डाऊनलोड करताना जरा जपूनच
सद्यस्थितीत विविध प्रकारचे ॲप आले आहेत. याची माहिती अनेकांच्या मोबाईलवर संदेश रुपाने येत असते. त्यातच हा ॲप डाऊनलोड करताना फोन कॉल्स, मीडिया गॅलरी, यासह तुमचा मोबाईलमधील डेटा प्राप्त करण्याची परवानगीही मागितली जाते. परिणामी ॲप डाऊनलोड करण्यापूर्वी सावधानता बाळगावी असे तज्ज्ञांचे मत आहे.
........................
असा कॉल व मेसेज आल्यास
१) एखाद वेळेस भ्रमणध्वनीवरून पासवर्ड किंवा ओटीपी विचारला जातो, मात्र तेव्हाही कुठलाही प्रतिसाद ग्राहकाने किंवा नागरिकांनी देऊ नये.
२) सीम व्हेरिफिकेशन किंवा अन्य सोशल मीडियाच्या बाबत माहिती देत संदेश आला तर त्याला निगलेक्ट करणे, हाच सर्वोत्तम उपाय आहे. त्याला कुठलाही प्रतिसाद देऊ नये, परिणामी फसवणुकीची शक्यताही शून्य असते.
३) कधीही कुठलीही बँक किंवा शासकीय कार्यालयामार्फत पासवर्ड किंवा आयडी क्रमांक मागत नाही. अशा वेळी सतर्कता बाळगून कुठलीही माहिती देऊ नये, यातून फसवणूक होत नाही.
............................................
अशी घ्या काळजी
सोशल मीडिया किंवा फोनवरून आलेल्या संदेशाला मोबाईलमधून डिलीट करून टाकावा. कधीही प्रतिसाद देऊ नये यामुळे आपण फसवणुकीपासून वाचू शकतो.
.............................
कोट
एखादवेळी आपल्या आधार क्रमांकाच्या आधारे ही अकाऊंट हॅक करून फसवणूक केली जाते. फेसबुक अकाऊंट या माध्यमातून हा प्रकार सातत्याने घडत आहे. त्यामुळे आपला ओटीपी पासवर्ड कोणालाही शेअर करू नका म्हणजे आपली फसवणूक होणार नाही.
- तेजस्विनी कदम, सायबर सेल प्रमुख गोंदिया.