एक ठार, दुसरा जखमी : मध्य प्रदेशातील रेल्वे क्रॉसिंगवरील अपघात
गोंदिया : गोंदिया-बालाघाट मार्गावरील गर्रा शिवारातील मानवरहित रेल्वे क्रॉसिंगवरून जाणार्या टॅÑक्टरला गोंदिया-बालाघाट रेल्वेगाडीने जबर धडक दिली. या धडकेत ट्रॅक्टर जवळपास २०० मीटर दूरपर्यंत फेकला आणि एका मजुराचा मृत्यू झाला. यात इतर एक जण गंभीर जखमी झाला. प्राप्त माहितीनुसार, गोंदिया-बालाघाट रेल्वे मार्गावर गर्रा स्टेशन परिसरात मानवरहित रेल्वे क्रॉसिंगजवळ कटंगीवरून गोंदियाकडे रेल्वेगाडी (७८८०४) येत होते. यादरम्यान मानवरहित फाटकाजवळ रेल्वे रूळ ओलांडणार्या ट्रॅक्टरला रेल्वेने जबर धडक दिली. या अपघातात शैलेश शंकरराव दमाहे (१७) याचा मृत्यू झाला व घनश्याम मानिकराम सवालाखे (३९) जखमी झाला. त्यांना उपचारासाठी बालाघाट येथील शासकीय रूग्णालयात दाखल करण्यात आले. सूरज व घनश्याम हे बालाघाट जिल्ह्याच्या सूरजाटोला व बपेरा येथील रहिवासी असल्याचे सांगितले जाते. हे दोघेही ट्रॉलीत रेती भरण्याचे काम करीत होते. अपघातानंतर ट्रॅक्टरचालक घटनास्थळावरून फरार झाला. घटनेची माहिती मिळताच गोंदियावरून मदतकार्य करणारे गाडी तत्काळ रवाना करण्यात आली. त्यात वरिष्ठ चिकित्सक डॉ.मंडल कैरिज, फोरमन अंसारी यांच्यासह ५० पेक्षा अधिक रेल्वे कर्मचारी उपस्थित होते. नागपूर मंडळाचे मंडळ परिचालन व्यवस्थापक शर्मा, मुख्य सूरक्षा अधिकारी अनुप सत्पथी, मुख्य मंडळ अभियंता आर.के. सिंह, मुख्य सिंग्नल व दूरसंचार अभियंता रंजीतकुमार, मुख्य विद्युत अभियंता सुब्बाराव आदी घटनास्थळी पोहचले. विशेष म्हणजे अपघाताच्या काही तासांपूर्वीच बिलासपूर मुख्यालयातून मुख्य सूरक्षा अधिकारी व इतर झोनल अधिकार्यांचे दल आपल्या नियमित भेटीसाठी गोंदियात आले होते. (जिल्हा प्रतिनिधी)