गोंदिया: तालुक्याच्या लोहारा येथील राजेश्वर ऊर्फ राजू डोमा किरसान (३६) याला मोटारसायकल चोरीच्या प्रकरणात २३ जून रोजी दुपारी गावकऱ्यांनी बेदम मारहाण करून त्याला बेशुद्ध अवस्थेत गाडीत टाकून नेले. त्याचा मृतदेह ६ जुलै रोजी बोपाबोडी येथील जंगलात पुरलेल्या अवस्थेत आढळला. यासंदर्भात दवनीवाडा पोलिसांनी या प्रकरणात १४ जणांवर खुनाचा व ॲट्रासिटीचा गुन्हा दाखल केला आहे. या प्रकरणातील आरोपींची तुरुंगात रवानगी करण्यात आली आहे.
मृताची पत्नी सेवागन किरसान (३०) यांच्या तक्रारीवरून दवनीवाडा पोलिसात भादंविच्या कलम ३०२, ३६४, ३२४, ५०४, ५०६, १४३, १४४ सहकलम ३१ (१) सहकलम ३ (२) व्ही.ए. २०१५ (३) (२) (५) अनुसूचित जाती- जमाती प्रतिबंधक कायद्यान्वये गुन्हा दाखल केला आहे. अटक करण्यात आलेल्या आरोपीत ग्यानिराम ऊर्फ बंडू बैतराम किरनापुरे (५०), कोमल ग्यानिराम किरनापुरे (२६), चंद्रीप्रकाश प्रेमलाल लिल्हारे (३५), विनोद ग्यानिराम किरणापुरे (२४), राहुल झनकलाल कटनकार (१९), गोपीचंद लोकचंद कटनकार (२१), काेमल योगराज नागपुरे (२८), ओमप्रकाश ऊर्फ दिनेश यादोराव नागपुरे (४५) गीता ग्यानिराम किरणापुरे (४५), निशिगंधा कोमल नागपुरे (२५) व भगवंतीबाई खेमलाल नागपुरे (३५) सर्व रा. लोहारा व इतर तीन अशा १४ जणांचा समावेश आहे. या आरोपींची भंडारा येथील तुरुंगात रवानगी करण्यात आली आहे.