गोंदिया : वाहतूक सुरळीत रहावी यासाठी शासनाने वाहतुकीचे नियम आखून दिले आहेत. हे नियम स्वत:सह पुढील व्यक्तीच्या सुरक्षेसाठी असतानाही कित्येकांकडून नियमांची मोडतोड केली जाते. अशात वाहतूक नियंत्रण विभागाला नियमांना तिलांजली देणाऱ्यांना दंड स्वरूपात दणका देण्याची तरतूद आहे. शहरातही अशा नियम मोडणाऱ्या बहाद्दरांची कमी नाही. सन २०२०मधील आकडेवारी बघतिल्यास येथील वाहतूक नियंत्रण शाखेने अशा नियम मोडणाऱ्यांचा दंडाचा दणका दिला असला तरीही त्यातील २५८३ बहाद्दरांनी पाच लाख ८२ हजार २००रुपये दंडाचा भरणा केलेलाच नाही.
सन २०२० हे वर्ष कोरोनाने ग्रासूनच सोडले होते. वर्षाच्या सुरुवातीलाच लॉकडाऊन लागले व त्या काळात कठोरतेने नियमांचे पालन करण्याची पाळी आली होती. अशात वाहतूक नियंत्रण शाखेने लॉकडाऊन नियमांचे पालन करीत वाहनचालकांवर कारवाया करीत दोन्ही बाजू सांभाळून घेतल्या. अशातच वाहतूक नियंत्रण शाखेने सन २०२०मध्ये विविध कलमांतर्गत केलेल्या ३७,१५४ कारवायांत ७७ लाख २४ हजार ४०० रुपयांचा दंड वसूल केला आहे, तर २५८३ कारवायांत पाच लाख ८२ हजार २०० रुपयांचा दंड अद्याप भरणा करण्यात आला नसल्याची माहिती आहे. विशेष म्हणजे, वाहतूक नियंत्रण शाखेेने विविध कलमांतर्गत या कारवाया केल्या असून, यातील काही कारवायांत लगेच दंडाची रक्कम वसूल केली जाते. मात्र कलमांतर्गत नंतर दंड भरण्याची तरतूद असल्याने त्याचा फायदा या बहाद्दरांनी घेतला आहे.
-------------------------
तरतूदच नाही...
दंड न भरल्याने वाहन परवाना रद्द करण्याची तरतूदच नसल्याने जिल्ह्यात अशी कारवाई करण्यात आलेली नाही, तर ज्यांना दंड ठोठावण्यात आला असूनही त्यांनी दंड भरला नाही असे पुढे वाहतूक नियंत्रण शाखेच्या हाती आल्यास त्यांच्याकडून जुना दंडही वसूल केला जातो. यामुळे नियम तोडून ते दंडापासून वाचू शकत नाही.
-----------------------------
वाहतुकीचे नियम सर्वांच्या सुरक्षेसाठी आहेत. यामुळे वाहन चालविताना नियमांचे काटेकोरपणे पालन करणे गरजेचे आहे. वाहतुकीचे नियम तोडल्याचा फटका कित्येकदा जिवावर बेततो. आपले जीवन अमूल्य आहे यामुळे नियमांचे पालन करा. कारण घरी तुमची वाट बघणारे आहेत.
- दिनेश तायडे
निरीक्षक, वाहतूक नियंत्रण शाखा, गोंदिया
------------------------------------
- नो पार्किंग - १८५ (पेड) - २५ (अनपेड)
- धोकादायक वाहन - ४०- ६
- ट्रिपलसीट- १४२२-१००
-विनापरवाना २८०८०- ३००
- मोबाइलवर बोलणे - २९६-१२
- अधिक वेग - ७४- ४