गोंदिया : बदलत्या काळानुसार आता परदेशवारी करणे अत्यंत सोपी बाब झाली असून देशातील कित्येक नागरिक आता फिरण्यासाठी म्हणूनही परदेशात जाऊन येतात. फिरण्यासाठी जाणाऱ्यांना काहीच दिवसांसाठी जावयाचे असल्याने ते काही दिवसांचा व्हीसा घेतात व परत येतात. मात्र, आता कित्येक भारतीयांचे परेदशातही उद्योगधंदे असून ते आपल्या कामानिमित्त कित्येक दिवसांसाठी परदेशात मुक्कामी जातात. याशिवाय शिक्षणासाठीही देशातील कित्येक विद्यार्थी परदेशात जात असून त्यांचा कित्येक वर्षांचा मुक्काम तेथेच असतो. अशात या उद्योगपती तसेच विद्यार्थ्यांना वाहन चालविण्यासाठी ड्रायव्हिंग लायसन्सची गरज असते. त्यांच्या सोयीसाठी आता येथूनच इंटरनॅशनल ड्रायव्हिंग लायसन्स दिले जात आहे. यामुळे अशा व्यक्ती आता येथूनच हे लायसन्स घेऊन परदेशात जात आहेत. यासाठी त्यांना संबंधित उपप्रादेशिक परिवहन कार्यालयात मागणी करावी लागते. जिल्ह्यातील अशा २४ व्यक्तींनी येथील उपप्रादेशिक परिवहन कार्यालयातून मागील ६ वर्षांत इंटरनॅशनल ड्रायव्हिंग लायसन्सची मागणी केली आहे.
----------------------------------
मुदत एक वर्षाची
- सामान्यत: इंटरनॅशनल ड्रायव्हिंग लायसन्सची मुदत एक वर्षाची असते. कारण बहुतांश व्हीसा एक वर्षासाठी दिला जातो. अशात संबंधित व्यक्तीचा व्हीसा संपल्यास लायसन्सचीही मुदत संपते.
- याशिवाय काही व्यक्ती जास्त कालावधी किंवा शिक्षणासाठी जात असल्याने एक वर्षानंतर पाच वर्षांसाठी किंवा त्यांचा व्हिसा कधी संपतो यानुसार त्यांना लायसन्स दिले जाते.
------------------------
ही लागतात कागदपत्रे
इंटरनॅशनल ड्रायव्हि्ंग लायसन्ससाठी उपप्रादेशिक परिवहन कार्यालयात येथील ड्रायव्हिंग लायसन्स, एक हजार रुपये फी, ३ पासपोर्ट आकाराचे फोटो, मेडिकल सर्टीफिकेट, संबंधित व्यक्तीचा पासपोर्ट तसेच मिळालेल्या व्हिसाचा पुरावा सादर करावा लागतो. त्यानुसार, उपप्रादेशिक परिवहन कार्यालयातून संपूर्ण प्रक्रिया करून इंटरनॅशनल ड्रायव्हिंग लायसन्स दिले जाते. शिवाय संबंधित व्यक्ती किती कालावधीसाठी परदेशात जात आहे हे बघून त्यांना लायसन्स दिले जाते.
-------------------------
कोट
सामान्यत: जास्त कालावधीकरिता परदेशात राहण्यासाठी जाणाऱ्यांकडूनच इंटरनॅशनल ड्रायव्हि्ंग लायसन्सची मागणी केली जाते. यात ज्यांचे परदेशात उद्योगधंदे वा नोकरी आहे किंवा शिकण्यासाठी जात असलेल्यांकडूनच मागणी आहे. विशेष म्हणजे, यातही ज्यांची आर्थिक स्थिती बरी आहे त्यांच्याकडूनच इंटरनॅशनल ड्रायव्हि्ंग लायसन्सची मागणी केली जाते. जिल्ह्यात मागील ६ वर्षांत २४ प्रकरणेच आली असून आपल्या जिल्ह्यासाठी ही बाब अत्यल्पच आहे.
- विजय चव्हाण, उपप्रादेशिक परिवहन अधिकारी, गोंदिया
-----------------------
किती जणांनी काढले इंटरनॅशनल ड्रायव्हि्ंग लायसन्स
२०१६- ४
२०१७- ४
२०१८- ३
२०१९ ५
२०२०- ५
२०२१- ३