गोंदिया : शाळा सुरू करण्याची लगबग शासन करीत आहे. शाळा सुरू झाली तरी लसीकरण न झाल्याने कोरोनाचा संसर्ग होऊ शकतो. यासाठी शिक्षक व शिक्षकेतर कर्मचाऱ्यांनी लसीचे दोन्ही डोस घेणे आवश्यक आहे. तेव्हाच शाळा सुरू केल्या जातील. यासाठी आता सरकारने शिक्षकांना ५ सप्टेंबरपर्यंत लसीकरण करून घ्या, अशा सूचना केल्या होत्या. तरीदेखील जिल्ह्यातील २३५ शिक्षकांनी लस घेतली नाही.
गोंदिया जिल्ह्यातील प्राथमिक शिक्षण विभागांतर्गत एकूण ३८२९ शिक्षक असून, यापैकी ३७१५ शिक्षकांनी पहिला डोस घेतला आहे. तर ११४ शिक्षकांनी अजूनही पहिला डोस घेतला नाही. दुसरा डोस घेणारे ३६२३ शिक्षक असून, २०६ शिक्षकांनी अद्याप दुसरा डोस घेतला नाही. माध्यमिक शिक्षण विभागात शिक्षक व शिक्षकेतर कर्मचारी असे ३५४४ लोकांपैकी ३४२३ लाेकांचे लसीकरण झाले असून, १२१ लोकांचे अद्याप लसीकरण झाले नाही. प्राथमिक आणि माध्यमिक अशा दोन विभागांतील २३५ शिक्षक व शिक्षकेतर कर्मचाऱ्यांचे लसीकरण अद्याप झाले नाही. सर्व शिक्षकांना शाळा सुरू होण्यापूर्वी लसीकरण गरजेचे आहे.
..........................
लस न घेणाऱ्यांवर शासनानुसार कारवाई
लसीकरण केल्याशिवाय शिक्षकांनी किंवा शिक्षकेतर कर्मचाऱ्यांनी शाळेत जाऊ नये. शासनाने सर्व शिक्षक व शिक्षकेतर कर्मचाऱ्यांचे लसीकरण करण्यास सांगितले आहे. वेळेच्या आत शंभर टक्के लसीकरण करण्यासाठी आमचे प्रयत्न सुरू आहे.
— प्रदीप समरीत, उपशिक्षणाधिकारी गोंदिया
..................
जिल्ह्यातील एकूण शिक्षक-७३७३
प्राथमिक विभाग
-पहिला डोस घेतलेले- ३,७१५
दोन्ही डोस घेतलेले- ३,६२३
लस न घेतलेले- २०६
----माध्यमिक विभाग-----
-पहिला डोस घेतलेले- ३,४२३
दोन्ही डोस घेतलेले- ३,२३३
लस न घेतलेले- १२१
...................
अनेक शिक्षक करतात दुर्लक्ष
शाळा सुरू नसल्याने लस घेण्यासाठी काही शिक्षक दुर्लक्ष करीत आहेत. काही शिक्षकांना जुना आजार असल्याने ते आपली औषध सुरू असल्याचे सांगून लस घेण्यास टाळतात. काही लोक डॉक्टरांचा सल्ला घेऊन लस घेऊ असे म्हणतात. शाळा सुरू होण्यापूर्वी शिक्षकांनी दोन्ही लसींचे डोस घेणे घेणे आवश्यक आहे. जिल्हा परिषदेचा शिक्षण विभागही लसीकरणासंदर्भात पाहिजे तेवढा गंभीर नाही.