प्रफुल्ल पटेल यांच्या चर्चेनंतर पाऊल : राजेंद्र जैन यांनी केली पाहणी : सर्व सुविधायुक्त असणार सेंटर
गोंदिया : जिल्ह्यात कोरोना बाधितांची वाढती संख्या लक्षात घेता कोविड केअर सेंटरची संख्या वाढविण्याबाबत खा. प्रफुल्ल पटेल यांनी पालकमंत्री नवाब मलिक यांच्याशी चर्चा केली होती. त्यानंतर जिल्हा प्रशासनाने जिल्हा क्रीडा संकुलातील बॅडमिंटन हॉलमध्ये १३६ खाटांचे सर्व सुविधायुक्त कोविड केअर सेंटर सुरु करण्याची प्रक्रिया सुरु केली होती. या कोविड केअर सेंटरची माजी आ. राजेंद्र जैन यांनी मंगळवारी भेट देऊन पाहणी केली. तसेच तेथील सोयी सुविधांचा आढावा घेतला.
येथील जिल्हा क्रीडा संकुलातील बॅडमिंटन हॉलमध्ये १३६ खाटांचे कोविड केअर सेंटर उभारण्याचे काम सध्या युद्ध पातळीवर सुरु आहे. येथे नवीन बेड, बिछाने, तसेच ऑक्सिजन पाईपलाईन टाकण्याचे काम सुद्धा युद्ध पातळीवर सुरु आहे. येत्या २ मे पासून हे कोविड केअर सेंटर रुग्णांसाठी उपलब्ध होणार आहे. विशेष म्हणजे १२२ बेडसाठी कूलर तसेच १४ वातानुकूलित बेड असणार आहेत. या कोविड केअर सेंटरचे काम जि. प. मुख्यकार्यकारी अधिकारी प्रदीप कुमार डांगे यांच्या नियंत्रणाखाली सुरु आहे. या कोविड केअर सेंटरमध्ये दाखल रुग्णांवर उपचार करण्याची जबाबदारी शासकीय वैद्यकीय महाविद्यालयावर सोपविण्यात आली असून अधिष्ठाता डॉ. नरेश तिरपुडे हे सुद्धा यावर लक्ष ठेवून आहेत. कोविड केअर सेंटरमुळे रुग्णांची होणारी गैरसोय टाळण्यासही मदत होणार आहे. माजी आ. राजेंद्र जैन यांनी मंगळवारी (दि.२७) सकाळी जिल्हा क्रीडा संकुलाला भेट देऊन तेथील कामाची आणि सोयी सुविधांची पाहणी केली. यावेळी त्यांच्यासोबत राष्ट्रवादी काँग्रेसचे नानू मुदलीयार, नगर सेवक विनीत शहारे, सुनील पटले, शैलेश वासनिक उपस्थित होते.
..........
खाटांची वाढविण्याची गरज पडल्यास वाढविण्याची तयारी
जिल्हा क्रीडा संकुलातील बॅडमिंटन सभागृहात १२२ खाटांचे कोविड केअर सेंटर सुरु करण्यात येणार आहे. याच सेंटर लगत असलेल्या एका छोट्या हॉलमध्ये सुद्धा १४ खाटांची व्यवस्था करण्यात आली आहे. या खाटा कमी पडल्यास वाढविण्याची तयारी सुद्धा प्रशासनाने ठेवली आहे. खा. प्रफुल्ल पटेल हे दाेन्ही जिल्ह्यातील कोविड परिस्थितीवर लक्ष ठेवून असून सातत्याने जिल्हा प्रशासनाच्या संपर्कात आहे.