नवेवाडे-वास्कोचा तरुण जागीच ठार

वास्को : बंद पडल्याने रस्त्याकडेला पार्क केलेल्या कदंब बसवर दुचाकी आदळून तरुण जागीच ठार झाला. माटवे-दाबोळी येथे रविवारी रात्री ८.५५च्या सुमारास हा अपघात झाला. पांडुरंग दत्ताराम च्यारी (वय २५) असे मृताचे नाव आहे. वास्को पोलीस स्थानकाचे उपनिरीक्षक रोहन माडगावकर यांनी दिलेल्या माहितीनुसार, पांडुरंग (रा. नवेवाडे-वास्को) हा बजाज डिस्कव्हर मोटारसायकलने पणजीहून वास्कोला येत होता. माटवे-दाबोळी येथे एका पुलाजवळ बंद पडलेली कदंब बस दुरुस्तीसाठी रस्त्याच्या कडेला पार्क केली होती. त्या वेळी पाऊसही पडत असल्याने मोटारसायकलवरील ताबा सुटल्याने त्याने विरुद्ध बाजूने या बसला जोरदार धडक दिली. त्यात तो जागीच ठार झाला. (प्रतिनिधी)