गोव्यात भीषण अपघातात ५ ठार

खोर्ली-ओल्ड गोवा येथील फोर-ए महामार्गावर टँकर व कारमध्ये झालेल्या भीषण अपघातात पाचजण मृत्युमुखी पडले, तर दोघांची प्रकृती अत्यंत गंभीर आहे

पणजी : खोर्ली-ओल्ड गोवा येथील फोर-ए महामार्गावर टँकर व कारमध्ये झालेल्या भीषण अपघातात पाचजण मृत्युमुखी पडले, तर दोघांची प्रकृती अत्यंत गंभीर आहे. मृतांत दोन पादचारी व गोव्यात स्थायिक झालेल्या ठाण्यातील तिघांचा समावेश आहे. दुर्घटनेनंतर ट्रकचालक पळून गेला.सोमवारी संध्याकाळी ४ वाजेच्या सुमारास हा अपघात घडला. फोंड्याहून पणजीच्या दिशेने भरधाव येत असलेल्या कारने खोर्ली पेट्रोलपंपजवळ रस्त्याच्या बाजूला उभ्या असलेल्या लुईस मिनेझिस (४८) व आयडा क्वेरोझ (५५) यांना धडक दिली. त्यात ते जागीच ठार झाले. वाहनावरील नियंत्रण सुटल्याने ही कार समोरून येणाऱ्या मालवाहू ट्रकवर धडकली. अपघातात कारचा पूर्ण चुराडा झाला. गाडीतील नातालिया परेरा (६०), वृषाली भोईर आणि चार वर्षांची चिमुरडी मनश्री भोईर यांचाही मृत्यू झाला. ठाणे येथील शानेल परेरा (३८) यांच्या मालकीची ही कार असून ते स्वत: गाडी चालवित होते. अपघातात ते जबर जखमी झाले आहेत. शनोन परेरा (२), रुपा परेरा (३५), साविया परेरा (१७) आणि सौरभ भोईर (३८) हे गाडीतील प्रवासी जखमी झाले आहेत. (प्रतिनिधी)