एक्सप्रेस गाड्यांना थांबा द्या

वडसा रेल्वे सल्लागार समितीची कोरोना विषाणूच्या पार्श्वभूमीवर मागील ११ महिन्यांनंतर पहिली सभा आयोजित केली होती. या सभेत गडचिरोली जिल्ह्यातील एकमेव रेल्वेस्टेशन असलेल्या वडसा रेल्वेस्टेशन मार्गे दरभंगा-सिकंदराबाद एक्सप्रेस, कोरबा-यशवंतपूर एक्सप्रेस, चेन्नई- गया एक्सप्रेस या तीन लांब पल्ल्याच्या गाड्या आठवड्यातून ये-जा करीत आहेत. आता जबलपूर-चांदा फोर्ट एक्सप्रेस दररोज धावणार आहे. यातील एकही रेल्वे वडसा रेल्वेस्टेशनवर थांबत नसल्याने गडचिरोली जिल्ह्यातील रेल्वे प्रवाशांना कवडीचाही फायदा होत नाही. त्यामुळे या चारही लांब पल्ल्याच्या एक्सप्रेस गाड्यांचा थांबा वडसा रेल्वेस्टेशन येथे देण्यात यावा, या प्रमुख मागणीसह दोन्ही प्लॅटफॉर्मवर कोच इंडीकेटर लावणे, प्लॅटफॉर्म नंबर दोनवर अनाऊंसमेंट सुविधा देणे, शुद्ध पाणी मिळण्याकरिता आर. ओ. लावणे, प्लॅटफॉर्म नंबर १ वर बोअरवेल खोदणे, ब्रम्हपुरी रोडवरील रेल्वे पादचारी उड्डाणपूल कुरखेडा आरमोरी रोडपर्यंत वाढविणे, प्रतीक्षालय हॉलचे सुरू असलेले बांधकाम तातडीने पूर्ण करणे आदी मागण्यांचा प्रस्ताव सर्वानुमते ठराव पारित करुन पाठविण्यात आला आहे. यावेळी वडसा रेल्वेस्टेशनचे प्रबंध व्यवस्थापक संजय कुमार यांच्यासह नवनियुक्त वडसा रेल्वे सल्लागार समिती सदस्य राजेश जेठानी, डॉ. विष्णू वैरागडे, दीपक विधाते, शालुताई दंडवते, संतोष शामदासानी, सचिन खरकाटे, प्रीतपालसिंग टुटेजा आणि ऋषी शेबे प्रामुख्याने उपस्थित होते.