फलक झळकावला : जीवे मारण्याची दिली धमकी आलापल्ली : अहेरी तालुक्यातील टेकमपल्ली, फुसूकपल्ली, मलमपल्ली येथील सर्व ग्राम पंचायत सदस्यांनी राजीनामा द्यावा, अन्यथा स्वत:च्या जीवितास हानी झाल्यास त्यांची जबाबदारी राहिल. असा फलक माओवाद्यांनी आलापल्ली- सिरोंचा मार्गावर टेकमपल्ली गावाजवळ बुधवारी लावला आहे. या फलकामुळे परिसरात खळबळ उडाली आहे. आलापल्ली-सिरोंचा या मुख्य मार्गावर टेकमपल्ली हे गाव असून गावापासून चार किमी अंतरावर बुधवारी टेकमपल्ली बसस्थानकालगत नक्षलवाद्यांनी बॅनर झळकाविला. या बॅनरवर तीन ग्राम पंचायतींच्या पदाधिकाऱ्यांना राजीनामा देण्यास सांगण्यात आले आहे. हे गाव आलापल्लीपासून दोन ते चार किमी अंतरावर असून नागेपल्ली ग्राम पंचायतीचे सरपंच या टेकमपल्लीच्याच असून त्या तेथील पोलीस पाटलाच्या कन्या आहे. या बॅनरमुळे राजकीय पुढाऱ्यांचे धाबे दणालले आहे. यापूर्वीही माओवाद्यांनी रवींद्र सुनकरी या तरूणाची हत्या केली. त्यावेळी पोलीस पाटील, कोतवाल व पोलीस खबरे यांना सरकारचे काम सोडण्याचा इशारा दिला होता. (वार्ताहर)
ग्राम पंचायत सदस्यांना राजीनामा देण्याचा माओवाद्यांचा फतवा
By admin | Updated: May 28, 2015 01:03 IST