देसाईगंज तालुक्यातील किन्हाळा/मोहटोला परीसरात मागील काही वर्षापासून कारले या भाजीपाला पिकाची मोठ्या प्रमाणात लागवड करण्यात येत आहे. सेंद्रीय खताचा वापर करून सदर पिक घेतल्या जात असल्याने व येथील कारले प्रत उच्च प्रतीची असल्याने लगतच्या चंद्रपुर, गोंदिया,भंडारा,नागपुर,
गडचिरोली जिल्ह्यासह छत्तीसगड, मध्यप्रदेश, आंध्रप्रदेश,तेलंगणा राज्यातुन मोठ्या प्रमाणात मागणी हाेते.
सुरुवातीला मागणी जास्त आणि आवक कमी असल्याने येथील कारल्यांना जागेवर ४२ रुपये प्रती किलो दर मिळु लागला होता. मात्र राज्यात कोरोना पाॅझिटिव्ह रुग्णांची दिवसेंदिवस अधिकाधिक भर पडत असल्याने बाहेरच्या व्यापाऱ्यांनी येथील कारले खरेदीकडे पाठ फिरविली आहे. स्थानिक व्यापाऱ्यांनी कारल्याच्या मागणीत घट झाल्याचे सबब पुढे करत जवळपासू पंधरा रुपये प्रती किलो दराने मागणी करु लागले आहेत. कारले पिक ऐन भरात असताना होत असलेली आवक पाहुन दर पाडुन खरेदी करण्यात येत असल्याचा आरोप शेतकऱ्यांमधून हाेत आहे. बदलत्या वातावरणाचा पिकाला फटका बसत असतानाच खरेदीदारांनी कारले खरेदीकडे पाठ फिरवल्याने लावलेला उत्पादन खर्चही भरून निघण्याची आशा धुसर झाली आहे. यामुळे शेतकऱ्यांना जबर फटका बसण्याची शक्यता वर्तवण्यात येत आहे. एकुणच होत असलेल्या प्रचंड नुकसानीमुळे शेतमालाच्या हमीभावावर प्रश्न चिन्ह लावल्या जाऊ लागला आहेत.