एलआयसीची उलाढाल थांबली

येथील भारतीय जीवन विमा निगम (एलआयसी)च्या मुख्य शाखेत विमा हप्त्याचे प्रिमीयम भरण्यासाठी

जिल्हाभर जाणवला मोठा परिणाम : प्रिमीयम भरणारे लाखो रूपये घेऊन आल्यापावली परतलेगडचिरोली : येथील भारतीय जीवन विमा निगम (एलआयसी)च्या मुख्य शाखेत विमा हप्त्याचे प्रिमीयम भरण्यासाठी अनेक नागरिक तसेच काही एलआयसी एजन्ट ५०० व १००० रूपयांच्या नोटांसह मोठी रोकड घेऊन आले होते. मात्र केंद्र सरकारने ५०० व १००० च्या नोटा चलनातून रद्द केल्याने एलआयसीच्या कॅशीअरने सदर नोटा कोणाकडूनही स्वीकारल्या नाही. त्यामुळे लाखो रूपयांची रोकड घेऊन अनेक नागरिक व एजन्ट आल्यापावली परतले. गडचिरोली एलआयसीच्या मुख्य शाखेत प्रिमीयमच्या माध्यमातून दररोज १२ ते १३ लाखांची उलाढाल होत असते. मात्र आज केवळ सात हजार रूपयांची रक्कमच काऊंटरवर दुपारपर्यंत जमा झाल्याची माहिती येथील कॅशीअरने लोकमतशी बोलताना दिली.एलआयसीचे गडचिरोली शहरात अनेक ठिकाणी प्रिमीयम स्वीकृती केंद्र आहेत. या ठिकाणीही अनेक नागरिक दररोज लाखो रूपयांचे प्रिमीयम भरतात व येथील रक्कम दुपारनंतर कॉम्प्लेक्स परिसरात असलेल्या एलआयसीच्या मुख्य शाखेत जमा केली जाते. मात्र ५०० व १००० च्या नोटा रद्द झाल्याचा निर्णय शासनाने घोषीत केल्यानंतर प्रिमीयम स्वीकृती केंद्रातूनही एलआयसीच्या मुख्य शाखेत आज रोकड जमा करण्यात आली नाही. एलआयसीच्या काऊंटरवर धनादेश व डीडीद्वारे प्रिमीयम भरण्याची सुविधा नेहमीप्रमाणे सुरू ठेवण्यात आली होती. केवळ १०० व ५० रूपयाच्या नोटा आणणाऱ्या ग्राहकांकडूनच त्यांचे विम्या हप्त्याचे प्रिमीयम काऊंटरवर स्वीकारण्यात आले. मात्र ५०० व १००० रूपयांच्या नोटा घेऊन आलेले अनेक ग्राहक लाखो रूपये घेऊन परत गेले. एकूणच दिवसभर एलआयसीच्या मुख्य शाखेत आर्थिक उलाढाल प्रचंड मंदावली होती.२२ हजार रूपये भरले न गेल्याने शेतकरी परतलाएलआयसीच्या विम्या हप्त्याची प्रलंबित रक्कम भरण्यासाठी गडचिरोली तालुक्याच्या ग्रामीण भागातून एका शेतकऱ्याने मंगळवारी धानाची विक्री केली. या विक्रीतून मिळालेली २२ हजार रूपयांची रोकड घेऊन सदर शेतकरी गडचिरोली येथील एलआयसीच्या मुख्य शाखेत दुपारच्या सुमारास आला होता. मात्र या शेतकऱ्याकडे ५०० व १००० रूपयांच्या नोटा असल्याने त्याचे प्रिमीयम स्वीकारण्यात आले नाही. त्यामुळे सदर शेतकरी रोकड घेऊन स्वगावी परतला.५०० व १००० रूपयाच्या नोटा प्रिमीयमसाठी ग्राहकांकडून घेऊ नयेत, अशा सूचना एलआयसीच्या विभागीय कार्यालयाकडून गडचिरोलीच्या एलआयसी कार्यालयाला सकाळीच प्राप्त झाल्या. त्यानुसार आम्ही ५०० व १००० च्या नोटा प्रिमीयमसाठी स्वीकारण्यात येणार नाही, असा फलक लावला. ज्यांच्याकडे १०० रूपयाच्या नोटा होत्या, अशा लोकांचे प्रिमीयम स्वीकारण्यात आले. मात्र ५० हजाार व एक लाख रूपयाचे प्रिमीयम भरणारे अनेक विमा एजन्ट व ग्राहक स्वत:कडील ५०० व हजारच्या नोटा असलेली रोकड परत नेली.- एस. टी. आत्राम, कॅशीअर, भारतीय जीवन विमा निगम कार्यालय गडचिरोलीकुरखेडात पेट्रोलपंप कामगाराशी वाहन चालकांचा वादकुरखेडा येथे पेट्रोलपंपावर ५०० व १००० च्या नोटा घेऊन पेट्रोल टाकण्यासाठी वाहनचालकांची मोठी गर्दी झाली होती. पेट्रोलपंप चालकाकडे चिल्लर नसल्याने ५०० रूपयांचे पेट्रोल टाकणे बंधनकारक करण्यात आले होते. यामुळे पंपावरील कामगाराशी अनेक वाहनचालकांचा वाद झाला. याबाबतची माहिती पोलीस उपनिरिक्षक कटारे यांना मिळताच त्यांनी शहरातील तिन्ही पेट्रोलपंपाना भेट देऊन ग्राहकांना परत न पाठविता दोन ते तीन ग्राहक मिळून एकत्रित पेट्रोल द्या व वाद टाळा, अशा सक्त सूचना दिल्या. दैनंदिन व्यवहारावरही केंद्र सरकारच्या या निर्णयाचा मोठा परिणाम कुरखेडा शहरात जाणवला, अशी माहिती किराणा व जनरल व्यावसायिक विवेक निरंकारी यांनी लोकमतशी बोलताना दिली. ७० ते ७५ टक्के व्यवसाय आज ठप्प होता, असेही ते म्हणाले.बीडीओंच्या मध्यस्तीनंतर एटापल्लीत नोटा स्वीकारल्या५०० व १००० रूपयांच्या नोटा शासनाने रद्द केल्याची माहिती मिळताच एटापल्ली शहरात सर्वत्र सुटे पैशासाठी अडचण जाणवू लागली. एटापल्ली शहरात पंचायत समिती प्रशासनामार्फत पेट्रोलपंप चालविला जातो. या पेट्रोलपंपावर सकाळच्या सुमारास ५०० व १००० रूपयांच्या नोटा असणाऱ्या वाहनधारकांना पेट्रोल देणे टाळले जात होते. अशा नोटा असणाऱ्या वाहनधारकांना ५०० व १००० रूपयांचे पेट्रोल टाका, असे बजाविण्यात येत होते. यामुळे पंपावर तणावाची परिस्थिती निर्माण झाली. दरम्यान शहरातील काही पत्रकारांनी थेट एटापल्लीचे बीडीओ इंदूरकर यांना याबाबीची माहिती दिली. बीडीओ इंदूरकर यांनी स्वत: पेट्रोलपंपावर भेट देऊन ५०० व १००० रूपयांच्या नोटा स्वीकारण्याचे निर्देश दिले. त्यानंतर पेट्रोलपंपावरील तणाव कमी झाला. औषध खरेदीसाठी नागरिकांना सुट्या पैशाअभावी अडचण जाणवत होती. सुटे पैसे मागू नका, असा सूर व्यावसायिकाकडून सर्वत्र दिसून येत होता.मांस विक्री बाजाराला नोटांच्या बंदीनंतरही अच्छे दिनकोरची या छत्तीसगड सीमेला लागून असलेल्या तालुक्यात १००० व ५०० ची नोट बंद झाल्यानंतर मांस विक्री बाजाराला बुधवारी अच्छे दिन आल्याचे विचित्र चित्र दिसून आले. कोरची येथील मांस विक्री दुकानात सकाळपासूनच ग्राहकांची गर्दी होती. ५०० रूपयांचे मटन घेणाऱ्यांकडून नोट स्वीकारण्यात येत होती. तसेच बुधवार असल्याने मच्छीविक्रीचाही बाजार अतिशय तेजीत असल्याचे दिसून आले. कोरचीत ९० टक्के व्यापाऱ्यांनी ५०० व १००० ची नोट घेण्यास नकार दिला. औषधी दुकान व दवाखाण्यात या नोटा स्वीकारण्यात आल्या. बोरकर पेट्रोल पंपावरही ५०० रूपयांचे पेट्रोल वाहनधारकांना टाकावे लागले. तेव्हाच येथे नोट चालली. असे एकूण चित्र दिवसभरच होते.