जिल्ह्यात काही ठिकाणी ऑक्सिजनसह व्हेंटिलेटरचे बेड उपलब्ध करून देण्यात आले आहेत. मात्र, त्या ठिकाणी तज्ज्ञ वैद्यकीय अधिकाऱ्यांअभावी सर्व यंत्र सामुग्री धूळखात पडून आहे. अशा परिस्थितीत सुविधा उपलब्ध असूनसुद्धा रुग्णांना सेवा देता येऊ शकत नाही. ही बाब लक्षात घेऊन राज्य शासनाने जिल्ह्याच्या बाराही तालुक्यात किमान १०० खाटांचे सर्व सोयींनी युक्त कोविड रुग्णालय सुरू करून तज्ज्ञ वैद्यकीय अधिकाऱ्यांची नियुक्ती करावी.
जिल्हा मुख्यालयात दररोज अनेक रुग्ण उपचारासाठी दाखल होतात. येथे येऊनसुद्धा तासंतास त्यांना ऑक्सिजन बेडसाठी प्रतीक्षा करावी लागते. काहींना तर बेडही मिळत नाही. अशीच परिस्थिती कायम राहिल्यास भविष्यात उपचारासाठी येणाऱ्या रुग्णांच्या रांगा लागण्याची शक्यता आहे. रुग्णांवर वेळेत उपचार होण्याकरिता स्थानिक पातळीवर (तालुकास्तरावर) १०० खाटांचे सर्व सोयींनी युक्त कोविड रुग्णालय सुरू झाल्यास उपचारासाठी मोठी मदत होणार आहे.
जिल्ह्यात कुठेही खासगी रुग्णालयात उपचाराची सुविधा नाही. त्यामुळे जिल्ह्याच्या बाराही तालुक्यातील रुग्णांची भीस्त ही शासकीय रुग्णालयांवरच आहे. यात सर्वच तालुक्यातून रुग्ण जिल्हा मुख्यालयात येत आहेत. तालुका मुख्यालय व जिल्हा मुख्यालयाचे अंतर मोठे आहे. रुग्ण गडचिरोली येथे आणण्याकरिता किमान दोन ते चार तास वेळ लागतो. या कालावधीत रुग्ण दगावण्याची शक्यता अधिक असते. या सर्व अडचणी लक्षात घेता तालुकास्तरावर उपचाराची सुविधा निर्माण करावी, अशी मागणी युवक काँग्रेसचे जिल्हाध्यक्ष महेंद्र ब्राम्हणवाडे यांनी केली आहे.