अंगणवाडी कर्मचाऱ्यांची रिक्त पदे भरण्याची मागणी

जिल्ह्यात एकूण १ हजार १७१ अंगणवाड्या असून त्यापैकी ३६ अंगणवाडी सेविका व ५५ अंगणवाडी मदतनिसांची पदे रिक्त आहेत.

गडचिरोली : जिल्ह्यात एकूण १ हजार १७१ अंगणवाड्या असून त्यापैकी ३६ अंगणवाडी सेविका व ५५ अंगणवाडी मदतनिसांची पदे रिक्त आहेत. या अंगणवाड्यांचा कारभार गावातील दुसऱ्या अंगणवाडीच्या कर्मचाऱ्याकडे किंवा दुसऱ्या गावातील अंगणवाडी कर्मचाऱ्याकडे सोपविला आहे. परिणामी विद्यार्थ्यांचे नुकसान होत असल्याने सदर पदे तत्काळ भरावी, अशी मागणी होत आहे. विद्यार्थ्यांच्या शिक्षणाची पहिली पायरी म्हणून अंगणवाडीला संबोधल्या जाते. विद्यार्थ्यांना शिक्षण देण्याबरोबरच त्यांच्यावर चांगले संस्कार केले जातात व पोषण करण्याची जबाबदारीसुध्दा अंगणवाडीवर आहे. गडचिरोली जिल्ह्यात एकूण १ हजार १७१ अंगणवाड्या व ५१८ मिनी अंगणवाड्या आहेत. अंगणवाडीमध्ये अंगणवाडी सेविका व अंगणवाडी मदतनिस ही दोन पदे मंजूर आहेत. विद्यार्थ्यांची संख्या लक्षात घेता ही दोन्ही पदे आवश्यक आहेत. मात्र इतर इतर विभागांप्रमाणेच बालकल्याण विभागालाही रिक्त पदांचे ग्रहण कायम आहे. अंगणवाडी मदतनिसांचे ५५, अंगणवाडी सेविकांचे ३६ व मिनी अंगणवाडी सेविकेचे ४५ पदे रिक्त आहेत. सदर पदे तत्काळ भरण्यात यावी, याबाबत अंगणवाडी कर्मचाऱ्यांच्या संघटनेच्या वतीने अनेक वेळा निवेदन देण्यात आले. मात्र अजूनपर्यंत ही पदे भरण्यात आली नाही. परिणामी लहान बालकांचे नुकसान होण्याची शक्यता आहे. (नगर प्रतिनिधी)