रस्त्याचे नूतनीकरण करण्याची मागणी

गावाच्या विकासात रस्ते अधिक महत्त्वाचे मानले जातात. रस्त्यांमुळे बऱ्याच साेयी गावात उपलब्ध होतात. नागरवाही गावात प्रवेश करण्यासाठी दोन रस्ते आहेत. दोन्ही रस्त्यांचे मागील बऱ्याच वर्षांपूर्वी डांबरीकरण झाले होते; परंतु सध्याची परिस्थिती बघता जागोजागी खड्डे पडल्याने वाहन चालकास मोठा त्रास सहन करावा लागताे. रस्त्यावरील डांबर उखडलेला आहे. त्यामुळे उखडलेल्या रस्त्यावरून वाहन किंवा सायकल चालविताना जागोजागी ब्रेकरवरून जात असल्याचा भास नागरिकांना होताे. अशातच वाहनांवरील नियंत्रण सुटण्याची भीती असते. सायकलस्वारांनासुद्धा या ठिकाणी खड्ड्यांचा मोठा त्रास होत आहे. प्रशासनाकडे बरेचदा निवेदन देऊनही या रस्त्याचे अजूनपर्यंत नव्याने डांबरीकरण करण्यात आले नाही. त्यामुळे नागरवाही गावातील रस्त्याची पावसाळ्यापूर्वी दुरुस्ती करून नूतनीकरण करावे, अशी मागणी नागरवाही येथील गावकऱ्यांनी केली आहे.