श्री मार्कंडेश्वराच्या मुख्य मंदिरातील गाभाऱ्यात असलेल्या शिवपिंडीची परंपरेनुसार ब्रह्म मुहूर्तावर पहाटे ४.३० ते ६ वाजेपर्यतमहापुजा करण्यात आली. या महापुजेचा मान जि.प. कृषी सभापती रमेश बारसागडे, त्यांच्या पत्नी कविता, व्यवसायिक प्रफुल्ल भांडेकर, पत्नी वैशाली, गुरव पुजारी पंकज महाराज पांडे, त्यांच्या पत्नी शुभांगी यांना मिळाला. नाना महाराज आमगावकर, रामू महाराज गायकवाड, श्रीकांत महाराज पांडे यांनी पौरोहित्य केले.
महापूजेच्या वेळी मंदिर परिसरात कोविड-१९ च्या नियमांचे पालन करत तहसीलदार जितेंद्र शिकतोडे, चामोर्शी पोलीस स्टेशनचे प्रभारी अधिकारी नागनाथ पाटील, मार्कंडेश्वर देवस्थान समितीचे अध्यक्ष गजानन भांडेकर, सचिव मृत्युंजय गायकवाड, सहसचिव रामुजी तिवाडे, दिलीप चलाख, जयराम चलाख, यश गण्यारपवार, गोपाल मेनेवाल, उज्वल गायकवाड उपस्थित होते. यावेळी संपूर्ण मंदिर परिसरात पोलिसांचा कडक बंदोबस्त होता. मार्कंडादेव येथील हार, फुले, नारळ, मूर्ती, फोटो विक्रीची दुकाने बंद ठेवण्यात आली होती. त्यामुळे भाविकांचा हिरमोड झाला.
वैरागड येथील भंडारेश्वराची जत्रा रद्द केली असली तरी भाविकांना कोरोनाचे नियम पाळत दर्शन घेऊ दिले जात होते. सायंकाळपर्यंत दर्शन घेण्यासाठी रांग कायम होती. यात्रा समितीच्या पदाधिकाऱ्यांनी लोक एकत्र येऊ नये यासाठी सगळ्या प्रतिबंधात्मक उपाययोजना केल्या होत्या. भाविकांना प्रसादाचे वितरण, पाण्याची व्यवस्था भंडारेश्वर समितीकडून करण्यात आली.
चपराळा मंदिरात पहाटे चार वाजता अभिषेक
आष्टी : चपराळा येथील शिवमंदिरात देवस्थानच्या सहा कर्मचाऱ्यांनी पहाटे ४ वाजतापासून महादेवाचा अभिषेक व पुजेला सुरुवात केली. त्यांनतर आरती करून महादेवाला प्रसाद अर्पण केला. हे देवस्थान संत कार्तिकस्वामी महाराज यांच्या पावन स्पर्शाने नावारूपाला आले. घनदाट जंगलात असणाऱ्या या मंदिरात महाशिवरात्रीला विदर्भ, तेलंगणा, मध्यप्रदेश तसेच इतर जिल्ह्यातील भाविक येतात. यावर्षी मात्र पहिल्यांदाच महाशिवरात्री यात्रा भरली नाही. त्यामुळे असंख्य भाविकांना घरीच महादेवाची पूजा करावी लागली.