दारू व तंबाखूमुक्त गावासाठी ७ ग्रा.पं. करणार प्रयत्न

मुक्तिपथ अभियानाचे संचालक मयूर गुप्ता यांनी दारूबंदी कायदा, तंबाखूबंदी कायद्यासंदर्भात विस्तृत माहिती दिली. गावात उद्धवणाऱ्या समस्यांवर विचारमंथन करण्यात आले. ग्रामपंचायत दारू व तंबाखूमुक्त राहणे का आवश्यक आहे. निवडणुकीपूर्वी निवडून येणाऱ्या उमेदवारांनी दारू व तंबाखूमुक्त गावाचे वचन दिले होते. त्याची वचनपूर्ती करणे. कोरोना काळात खर्रा व तंबाखूजन्य पदार्थांचे सेवन करून थुंकल्यामुळे विषाणूचे संक्रमण वाढण्याची शक्यता आहे. यासाठी गावातून तंबाखू हद्दपार करण्यासाठी प्रयत्न करणे. ग्रामपंचायत अंतर्गत येणाऱ्या गावात अवैध दारूविक्री सुरू असल्यास त्यांना नोटीसच्या माध्यमातून दारूविक्री बंद करण्याचे आवाहन करणे. दारूबंदी असून तंबाखूविक्री सुरु असल्यास तंबाखूजन्य पदार्थांची विक्री बंद करणे. गावातील अवैध दारू व तंबाखूविक्री बंद झाल्यास गावाचा विकास होणार. याबाबत उपस्थित ग्रामपंचायत सरपंच, उपसरपंच व सदस्यांना मार्गदर्शन करण्यात आले. या कार्यशाळेत ग्रामपंचायत पोर्ला, नगरी, नवरगाव, चुरचुरा, वसा, साखरा व काटली या सात ग्रामपंचायतचे सरपंच, उपसरपंच, सदस्य सहभागी झाले होते. कार्यशाळेच्या यशस्वीतेसाठी मुक्तिपथचे गणेश कोलगिरे, तालुका संघटक अमोल वाकुडकर, उपसंघटक रेवनाथ मेश्राम यांनी सहकार्य केले.