गडचिरोली : तालुक्यातील माडेमूल- रानमूल जंगल परिसरातील नदीकाठी असलेले दारूचे अड्डे उद्ध्वस्त केले आहे. सोबतच १० ठिकाणावरून मिळालेला १ लाख २० हजार रुपये किमतीचा २० क्विंटल मोहसडवा व साहित्य नष्ट करण्यात आली. गडचिरोली पोलीस व मुक्तीपथ तालुका चमूने संयुक्तरित्या ही कारवाई केल्याने दारूविक्रेत्यांचे मोठे नुकसान करण्यात यश आले आहे.
माडेमूल- रानमूल या गावांच्या माध्यमातून जिल्हा मुख्यालयासह तालुक्यात व चामोर्शी तालुक्यातील इतर गावांतसुद्धा दारू पुरविली जाते. यामुळे परिसरातील अनेक गावे त्रस्त झाले आहेत. झगडे-भांडणांचे प्रमाण अधिक झाले आहे. याबाबत गडचिरोली पोलीस ठाण्यात वारंवार तक्रारी प्राप्त होत होत्या. गडचिरोली पोलीस व मुक्तीपथ तालुका चमूने संयुक्तरित्या माडेमूल- रानमूल जंगल परिसरात अहिंसक कृती करण्याचे ठरविले. त्यानुसार जंगलपरिसरात शोधमोहीम राबवत दारू अड्डे उद्ध्वस्त केले. विविध ठिकाणी टाकलेला १ लक्ष २० हजार रुपये किमतीचा २० क्विंटल मोहसडवा व दारू गाळण्याचे साहित्य नष्ट करण्यात आले आहे. यामुळे दारूविक्रेत्यांचे मोठे नुकसान झाले असून त्यांच्यात भीतीचे वातावरण निर्माण झाले आहे.
पोलीस अधीक्षक अंकीत गोयल यांच्या आदेशाने ॲक्शन प्लॅननुसार तालुक्यातील अवैध दारू विक्रेत्यांविरोधात मोहीम सुरू आहे. त्यानुसार तालुक्यातील मुजोर गावातील दारू विक्रेत्यांविरोधात गडचिरोली पोलिसांचे धाडसत्र सुरू आहे. अलोनी, चांदाळा, माडेमूल-रानमूल येथे केलेल्या कारवाईमुळे तालुक्यातील दारू विक्रेते धास्तावले आहेत. ही कारवाई गडचिरोलीचे ठाणेदार दामदेव मंडलवार यांच्या मार्गदर्शनाखाली पोलीस उपनिरीक्षक एस. बी. गोपाले, हवालदार शिवदास दुर्गे, चंद्रभान मडावी, लोणारे, जेंगठे, लोणारकर, मुक्तिपथ तालुका संघटक अमोल वाकूडकर, तालुका उपसंघटक रेवनाथ मेश्राम यांनी केली.
फोटो ओळ - मोहसडवा नष्ट करताना पोलीस व मुक्तिपथ चमू