मेंढ्यांना हाकलले म्हणून एकास मारहाण

निकुंभे गावातील घटना, दोघांविरुध्द गुन्हा

धुळे : शेतात घुसलेल्या मेंढ्या हाकलण्याच्या कारणावरुन एकास लाठ्या काठ्यांनी मारहाण केल्याची घटना धुळे तालुक्यातील निकुंभे गावात मंगळवारी दुपारी घडली़ दोघांविरुध्द गुन्हा दाखल झाला़धुळे तालुक्यातील निकुंभे गावशिवारातील एका शेतात मंगळवारी दुपारी १ वाजेच्या सुमारास मेंढ्या घुसल्या़ त्यांना शेतातून बाहेर हाकलत असताना त्याचा राग आल्याने त्याचे वाईट वाटून शिवीगाळ करण्यात आली़ यातून वाद निर्माण झाल्याने हाणामारीपर्यंत मजल पोहचली़ काठीने मारहाण केल्याने डोक्याला, उजव्या हाताच्या कोपऱ्याला, मनगटाला आणि पायाला जबर दुखापत झाली़ घटनेनंतर तातडीने जखमी झालेल्या आनंदा पाटील यांना रुग्णालयात उपचारासाठी दाखल करण्यात आले असून त्यांच्यावर उपचार सुरु आहेत़ याप्रकरणी सोनगीर पोलीस ठाण्यात मंगळवारी रात्री साडेआठ वाजेच्या सुमारास आनंदा पुंजाराम पाटील (४०, रा़ निकुंभे ता़ धुळे) यांनी फिर्याद दाखल केली आहे़ त्यानुसार भिला ठेलारी (टिळे), लक्ष्मण ठेलारी (टिळे) (दोन्ही रा़ टिळे नगर, ता़ धुळे) यांच्या विरोधात गुन्हा दाखल झाला़