महानगरात दोन ते अडीच लाखांहून अधिक घरगुती गॅस वापरणाऱ्यांची संख्या आहे. या सर्वांना भारत गॅस, एचपी, इंडेन गॅस अशा कंपन्यांच्या माध्यमातून घरपोच गॅस सिलिंडरचा पुरवठा केला जातो. घरोघरी गॅस सिलिंडरचा पुरवठा करणाऱ्यांची संख्या ५०० च्या जवळपास आहे. यातील काही जण बाधित झाले होते. परंतु, बहुतेकांचे लसीकरण अद्यापही करण्यात आले नाही. यांना दररोज अनेकांच्या घरी जाऊन घरपोच सिलिंडरचा पुरवठा करावा लागत असल्याने अनेकांच्या संपर्कात येत असतात. त्यामुळे धोका होण्याची शक्यता नाकारता येत नाही. परिणामी, तिसऱ्या लाटेच्या पूर्वी लसीकरण करण्यात यावे, अशी मागणी होत आहे.
सिलिंडर सॅनिटाईज केले का?
महानगरात गॅस वितरण करणाऱ्या डिलिव्हरी बाॅयजवळ सॅनिटाइजर दिसून येत नाही किंवा सिलिंडर देतानाही सिलिंडरला सॅनिटाईज केले जात नाही. त्यामुळे घरातील मंडळी किचनमध्ये सिलिंडर ठेवण्याची विनंती त्याला करीत असतात. नेहमीचेच संबंध असल्यामुळे डिलिव्हरी बाॅयदेखील किचनपर्यंत सिलिंडर नेऊन देतो. परंतु, सिलिंडर सॅनिटाईझ करून घेण्याची तसदी कोणीही घेत नाही.
अनेक जण आढळले पॉझिटिव्ह
शहरात गॅस घरपोच करणाऱ्यांची संख्या ३०० च्या जवळपास आहे. त्यापैकी काही जणांना कोरोनाची बाधा झाली होती. परंतु, आजपर्यंत अनेकांना लस उपलब्ध झालेली नाही. घरोघरी सेवा देणाऱ्या या वितरकांसह गॅस एजन्सीमध्ये काम करणाऱ्या प्रत्येक कर्मचाऱ्याचे लसीकरण करून घेणे गरजेचे आहे. त्यासाठी प्रशासनाने उपाययोजना करणे गरजेचे आहे.
जबाबदारी कुणाची?
जिल्ह्यात गॅस वितरित करणाऱ्या तसेच इतर जीवनावश्यक साहित्य, खाण्याचे पदार्थ व इतर सेवा घरपोच देणाऱ्या वितरकांना, डिलिव्हरी बॉयला लस देण्याची जबाबदारी कुणाची आहे, तसेच त्यांची वेळोवेळी कोरोना तपासणी केली जाते काय, असे अनेक प्रश्न यामुळे निर्माण होत आहेत.
मास्क घालूनच सिलिंडरचा पुरवठा करीत असतो. आम्ही अनेकांच्या संपर्कात येत असल्याने आम्हाला लसीकरण करणे गरजेचे होते. मात्र १८ वर्षांवरील नागरिकांचे लसीकरण बंद झाल्याने माझे लसीकरण व्हायचे आहे.
- गॅस वितरक