धुळे - जिल्ह्यातील कोरोना बाधित रुग्णांच्या संख्येत मोठी वाढ झाली आहे. त्यामुळे कोविड केअर केंद्र व कोविड हेल्थ केअर केंद्रांवर दाखल होणाऱ्या रुग्णांची संख्या वाढली आहे. कोविड केअर केंद्रात येणाऱ्या नातेवाईकांची गर्दी वाढली आहे. आओ जाओ घर तुम्हारा अशी स्थिती कोविड केअर केंद्रात झाली आहे. यामुळे कोरोनाचा प्रादुर्भाव आणखी वाढण्याची शक्यता आहे.
साक्री रोड परिसरातील जुन्या जिल्हा रुग्णालयात ३५ रुग्ण उपचार घेत आहेत. याचठिकाणी असलेल्या महानगरपालिकेच्या डेडिकेटेड हेल्थ केअर सेंटरमध्ये १० रुग्ण दाखल आहेत. हिरे वैद्यकीय महाविद्यालयात २२०, एसीपीएम वैद्यकीय महाविद्यालयात ४०, शिरपूर येथील कोविड केअर केंद्रात ६० रुग्ण उपचार घेत आहेत. ऑक्टोबर महिन्यानंतर जिल्ह्यातील बाधित रुग्णांची संख्या कमी झाली होती. त्यामुळे कोविड केअर केंद्रे बंद करण्यात आली होती. आता मात्र कोविड केअर केंद्रे उघडण्यात आली आहेत. काही कोविड केअर केंद्रे लवकरच उघडण्यात येणार असल्याची माहिती प्रशासनाने दिली आहे. कोविड केअर केंद्रात रुग्णांचे नातेवाईक जात असल्यामुळे कोरोनाचा प्रसार अधिक वेगाने होऊ शकतो. त्यामुळे प्रशासनाने कडक पावले उचलण्याची गरज आहे.
मनपा हेल्थ केअर सेंटर
गेटबाहेर गर्दी -
येथील जिल्हा रुग्णालयाच्या परिसरात महानगर पालिकेने डेडिकेटेड कोविड हेल्थ सेंटर सुरु केले आहे. ६० रुग्णांची या हेल्थ केअर केंद्राची क्षमता आहे. सध्या १० रुग्ण याठिकाणी दाखल आहेत. इमारतीच्या वरच्या मजल्यावर रुग्णांची व्यवस्था करण्यात आली आहे. मात्र खाली असलेल्या प्रवेशद्वाराबाहेर नातेवाईकांची गर्दी आढळली.
शिंदखेडा कोविड केअर केंद्र -
शिंदखेडा तालुक्यातील बाधित रुग्णांची संख्या वाढली आहे. त्यामुळे येथील कोविड केअर केंद्रात उपचार घेणाऱ्या रुग्णांची संख्या वाढली आहे. मात्र कोविड केअर केंद्रात रुग्णांच्या नातेवाईकांची ये - जा वाढली आहे. ग्रामीण भागातील रुग्ण येथे दाखल आहेत. नातेवाईकांच्या मुक्त संचारामुळे ग्रामीण भागात कोरोनाचा प्रसार वेगाने होऊ शकतो.
नातेवाईकांना आत प्रवेश नाही -
जिल्ह्यातील कोविड केअर केंद्रात कोरोना बाधित रुग्णांवर उपचार सुरु आहेत. याठिकाणी नातेवाईकांना प्रवेश दिला जात नाही. जरी नातेवाईक आले तरी ते कोविड केंद्राबाहेरच असतात. त्यांना आत प्रवेश दिला जात नाही. कोविड केंद्रात फक्त डॉक्टर व वैद्यकीय कर्मचाऱ्यांनाच प्रवेश आहे.
- डॉ संतोष नवले, जिल्हा आरोग्य अधिकारी