गप्पा मारतानाचे व्हिडीओ व्हायरल, दोघांविरुद्ध गुन्हा

देवपूर पोलीस ठाण्यातील कर्मचारी संदीप अहिरे यांनी फिर्याद दाखल केली. त्यानुसार, शुक्रवारी सायंकाळी साडेचार ते पाच वाजेच्या सुमारास सुफियान अन्सारी मोेहम्मद इदरिस (रा. हाजीनगर, वडजाई रोड, धुळे) याने शहरातील संभाजी गार्डनमध्ये गप्पा करीत असलेल्या मुलगा आणि मुलीचे मोबाईलमध्ये व्हिडीओ चित्रीकरण केले. तर आकीब शहा सादीक शहा (रा. हाजीनगर, वडजाई रोड, धुळे) याने हे चित्रीकरण दोन वेगवेगळ्या क्रमांकाच्या मोबाईलवरून इतर मोबाईलवर व्हायरल केले. याद्वारे दोघांनी दोन समाजात तेढ निर्माण करण्याचा प्रयत्न केला. तसेच गणेशोत्सवादरम्यान कायदा व सुव्यवस्था बिघडविण्यासह शहराचे वातावरण खराब होईल अशी भावना उत्तेजित करणारा व्हिडीओ जाणीवपूर्वक आणि पूर्वग्रहदूषित बुद्धीने सोशल मीडियावर व्हायरल केला आहे. यावरुन दोघांविरुद्ध भादंवि कलम १५३ अ, २९५ अ, ५०४ अन्वये गुन्हा दाखल करण्यात आला आहे.