अणदूर : मित्राचे निधन झाल्याची वार्ता कळताच जड अंतःकरणाने पुणे येथील तिघे मित्र अंत्यसंस्कारासाठी येत हाेते. ते इंदापूरनजीक आले असता, रिक्षाला अपघात झाला. या घटनेत अणदूर येथील एकाचा ६ मे राेजी सकाळी ८ वाजता उपचारादरम्यान मृत्यू झाला. या घटनेमुळे संपूर्ण गावावर शाेककळा पसरली.
तुळजापूर तालुक्यातील काटगाव येथील लहुजी शक्ती सेनेचे प्रदेशाध्यक्ष साेमनाथ कांबळे यांचे ४ मेच्या रात्री निधन झाले हाेते. मित्राच्या निधनाची बातमी कळताच त्यांचे पुणे येथील मित्र उमेश गीरजाप्पा सगट व अन्य दाेघे काटगावच्या दिशेने निघाले. त्यांची रिक्षा इंदापूरनजीक आली असता अपघात झाला. या दुर्घटनेत तिघेही जखमी झाले. गंभीर स्वरूपाची दुखापत झाल्याने उमेश सगट यांना तातडीने साेलापूर येथील छत्रपती शिवाजी महाराज शासकीय रुग्णालयात दाखल करण्यात आले. थाेडाही विलंब न करता, त्यांच्यावर उपचारही सुरू करण्यात आले. मात्र, उपचार सुरू असतानाच ६ मे राेजी सकाळी ८ वाजेच्या सुमारास त्यांचा मृत्यू झाला. त्यांच्या पार्थिवावर अणदूर येथील हाळावरील स्मशानभूमीत अंत्यसंस्कार करण्यात आले. त्यांच्या पश्चात पत्नी, मुलगा, मुलगी, आई, दोन भाऊ, दोन बहिणी असा परिवार आहे.