कळंब : मराठवाडा वॉटरग्रीड ही योजना गुंडाळली हा विरोधकांचा आरोप खोटा व दिशाभूल करणारा आहे. ही योजना टप्प्याटप्प्याने राबविण्यात येणार आहे. या योजनेतील उस्मानाबाद, लातूर जिल्ह्यातील कामांचा दुसऱ्या टप्प्यात समावेश असून, त्यासाठी निधीची तरतूद करण्यात येणार असल्याची माहिती राज्याचे पाणीपुरवठा व इतर खात्याचे राज्यमंत्री संजय बनसोडे यांनी दिली.
कळंब न. प.च्या विविध विकासकामांच्या उद्घाटनानिमित्त आयोजित कार्यक्रमात ते बोलत होते. अध्यक्षस्थानी नगराध्यक्षा सुवर्णा सागर मुंडे होत्या. खा. ओमराजे निंबाळकर, आ. विक्रम काळे, आ. कैलास पाटील, जि.प.चे माजी अध्यक्ष जीवनराव गोरे, माजी आ. राहुल मोटे, जिल्हा बँकेचे अध्यक्ष सुरेश बिराजदार, उस्मानाबादचे नगराध्यक्ष मकरंद राजेनिंबाळकर, अमित शिंदे, उदगीरचे माजी नगराध्यक्ष रामेश्वर निटुरे, प्रतापसिंह पाटील, नितीन बागल, बीड महिला राष्ट्रवादीच्या जिल्हाध्यक्षा संगीता तुपसागर, माजी नगराध्यक्ष शिवाजी कापसे, श्रीधर भवर, काँग्रेसचे तालुकाध्यक्ष पांडुरंग कुंभार, उपजिल्हाधिकारी अहिल्या गाठाळ, मुख्याधिकारी शैला डाके यांची व्यासपीठावर उपस्थिती होती.
बनसोडे यांच्या हस्ते गांधीनगर, सोनार गल्ली ते स्वा. सावरकर चौक रस्ता, बौद्धविहार, शिवाजी महाविद्यालय रस्ता, डॉ. लोंढे घरासमोरील रस्ता तसेच वीर जिवाजी महाले चौक नामफलकाचे अनावरण, ज्येष्ठ नागरिक विरंगुळा कक्ष, वृक्षारोपण तसेच सांस्कृतिक भवनचे उद्घाटन करण्यात आले. राज्यमंत्री बनसोडे म्हणाले, कळंब शहराच्या विकासाचा मास्टर प्लॅन तयार करून तो शासनाकडे सादर करा. यासाठी मंत्रालयात संबंधितांची बैठक लावून आवश्यक निधी मंजूर करू.
प्रारंभी प्रभारी नगराध्यक्ष संजय मुंदडा यांनी प्रास्ताविक करताना मागील साडेचार वर्षात न.प.न. केलेल्या भरीव विकासकामांचा आढावा सादर केला. यावेळी शहरातील प्रधानमंत्री आवास योजनेतील लाभार्थ्यांना प्रातिनिधिक स्वरूपात घरांचे प्रमाणपत्र वितरित करण्यात आले. कोरोना काळात उल्लेखनीय कार्य करणारे उपजिल्हा रुग्णालयाचे वैद्यकीय अधीक्षक डॉ. जीवन वायदंडे, डॉ. स्वप्निल शिंदे, डॉ. प्रशांत जोशी, अमर चाऊस, भय्या बावीकर यांचा बनसोडे यांच्या हस्ते सत्कार करण्यात आला. अध्यक्षीय समारोपात नगराध्यक्षा मुंडे यांनी कळंबकरांच्या विविध मागण्या मान्यवरांकडे मांडल्या. सूत्रसंचालन विशाल वाघमारे, रेजा पायाळ यांनी केले.
चौकट -
पाणीपुरवठ्यासह ईदगाह, शिवसृष्टीसाठी मिळणार निधी
शहरातील अल्पसंख्याक समाजबांधवांसाठी ईदगाह मैदानाचा प्रश्न मागील अनेक वर्षांपासून रखडला होता. न.प.न. काही दिवसांपूर्वीच ठराव घेऊन यासाठी जागा उपलब्ध करून दिली. यासाठी दीड कोटी, शिवसृष्टीसाठी अडीच कोटी तर पाणीपुरवठा योजनेसाठी ५६ कोटी रुपयांचा निधी देण्याची घोषणा राज्यमंत्री बनसोडे यांनी यावेळी केली.
चौकट -
टीमचे कौतुक
कळंब शहराच्या नियोजनबद्ध विकासासाठी नगराध्यक्षा सुवर्णा मुंडे, उपनगराध्यक्ष संजय मुंदडा व त्यांच्या सहकारी नगरसेवकांनी केलेल्या नियोजनाचे राज्यमंत्री बनसोडे, खा. निंबाळकर, आ. काळे, आ. पाटील व उपस्थित सर्व मान्यवरांनी कौतुक केले. शहराच्या सर्वांगीण विकासासाठी सदैव सहकार्याचा हात देण्याची भूमिका या मान्यवरांनी व्यक्त केली.
250721\img-20210725-wa0041.jpg
कळंब न प च्या सांस्कृतिक भवनचे भूमिपूजन राज्यमंत्री संजय बनसोडे यांच्या हस्ते करण्यात आले. यावेळी खा ओमराजे निंबाळकर, आ विक्रम काळे, आ कैलास पाटील, नगराध्यक्षा सुवर्णा मुंडे,उपनगराध्यक्ष संजय मुंदडा आदी उपस्थित होते