लोहारा : लोहारा नगरपंचायतची मुदत ६ मे संपल्याने जिल्हाधिकारी यांनी उपविभागीय अधिकारी विठ्ठल उमदले यांची प्रशासक म्हणून नियुक्ती केली आहे.
लोहारा नगरपंचायत निवडणुकीच्या अनुषंगाने प्रभाग रचना, आरक्षण सोडतीचा कार्यक्रम झाला आहे. त्यानंतर जिल्हाधिकारी यांच्या ३० मार्चच्या आदेशानुसार लोहारा नगरपंचायतच्या सार्वत्रिक निवडणुकीकरिता मतदार यादी कार्यक्रम २०२१-२२ घेण्याचे आदेश दिले आहेत. या आदेशाप्रमाणे नगरपंचायतीच्या संकेतस्थळावर ऑनलाइन प्रभागनिहाय मतदार यादी प्रसिद्ध करण्यात आली आहे. या मतदार यादीवर १९ ते २९ एप्रिलपर्यंत हरकती व सूचना शहरातील जनतेकडून मागविण्यात आल्या. त्यात कोरोनाचा प्रादुर्भाव राज्यभर वाढत आहेत. त्यामुळे निवडणूक आयोगाने सर्वच निवडणूका रद्द केल्या. त्यात लोहारा नगरपंचायतची निवडणूक ही रद्द झाली. परिणामी विद्यमान नगराध्यक्षा ज्योती मुळे, उपनगरध्यक्ष प्रताप मुळे यांच्यासह सर्वच नगरसेवकांचा कार्यकाळ ६ मे रोजी गुरुवारी संपला आहे. त्यामुळे जिल्हाधिकारी कौस्तुभ दिवेगावकर यांनी लोहारा नगरपंचायतच्या प्रशासकपदी उपविभागीय अधिकारी विठ्ठल उमदले यांची नियुक्ती केली आहे. ७ मे रोजी पदभार स्वीकारण्याच्या सूचना ही देण्यात आल्या आहेत.