आज उमरगा येथुन शुभारंभ.
उमरगा : कोविड रुग्णांच्या नातेवाईकांना रुग्णवाहिकेसाठी येणारा अवाढव्य खर्च कमी करावा या हेतूने रिलायन्स पेट्रोलियम कंपनीच्या वतीने अशा रुग्णवाहिकांसाठी आता मोफत इंधन पुरविले जाणार आहे. याचा शुभारंभ मंगळवारी येथील रिलायन्स पेट्रोलपंपावर आमदार ज्ञानराज चौगुले यांच्या हस्ते व जिल्हा शल्यचिकित्सक डॉ. धनंजय पाटील, किरण गायकवाड यांच्या प्रमुख उपस्थितीत करण्यात आला.
सध्या कोरोनाच्या गंभीर परिस्थितीत अनेक गरजू रुग्णांना रुग्णवाहिकेची गरज भासत आहे. परंतु, यासाठी मोठी रक्कम मोजावी लागत आहे. त्यामुळे रिलायन्स पेट्रोलियमद्वारे कोरोनाग्रस्त रुग्णांना घेऊन जाणाऱ्या खाजगी व शासकीय रुग्णवाहिकांना दररोज ५० लिटर याप्रमाणे मोफत इंधन देण्याचा उपक्रम हाती घेतला आहे. सुरुवातीला सदर उपक्रम केवळ मोठ्या शहरात राबविण्यात येत होता. परंतु, सध्या कोरोनाचा प्रादुर्भाव ग्रामीण भागातही वाढत असल्याने व खरी गरज ग्रामीण भागातील रुग्णांना असल्याने ग्रामीण भागातही हा उपक्रम सुरू करण्यात आला आहे. उस्मानाबाद जिल्ह्यातील या उपक्रमाचा शुभारंभ उमरगा येथून करण्यात आला.
यावेळी शिवसेना तालुकाप्रमुख बाबुराव शहापुरे, उमरगा रिलायन्स पेट्रोलपंपाचे संचालक विक्रम माणिकवार, स्पर्श ग्रामीण रुग्णालयाचे समन्वयक रमाकांत जोशी, डॉ.वसंत बाबरे, १०८ रुग्णवाहिका समन्वयक जयराम शिंदे, नगरसेवक पंढरीनाथ कोणे, युवा सेना माजी तालुकाप्रमुख योगेश तपसाळे, माजी नगरसेवक विवेक हराळकर, शरद पवार, राघवेंद्र माणिकवार, पेट्रोलपंप व्यवस्थापक सिद्धेश्वर मुर्गे, शाहूराज माने आदी उपस्थित होते.
चौकट......
गरजूंना माफक दर आकारावा
उपक्रमाच्या शुभारंभ प्रसंगी उमरगा येथील उपजिल्हा रुग्णालय, मुरूम व लोहाऱ्यातील ग्रामीण रुग्णालय, सास्तूरचे स्पर्श ग्रामीण रुग्णालय येथील रुग्णवाहिका व १०८ च्या रुग्णवाहिका, कोरोना रुग्णांसाठी मागील काही दिवसांपासून सेवा देणाऱ्या शिवसेनेच्या ३ रुग्णवाहिका तसेच इतर खाजगी रुग्णवाहिका यांना या उपक्रमाचा लाभ देण्यात आला. दरम्यान, खाजगी रुग्णवाहिकांनाही मोफत इंधन मिळत असल्यामुळे गरजू रुग्णांकडून माफक दर घेण्याच्या सूचना आ. चौगुले यांनी यावेळी केल्या.