कळंब : तालुक्यातील डिकसळ येथील अंगणवाडीमध्ये एकविसाव्या शतकातील ‘लक्ष्मी’ म्हणून दोन विद्यार्थिनींना मान देण्यात आला. या वेळी विद्येचे प्रतीक असलेले पुस्तक हाती घेऊन या विद्यार्थिनी गौरीच्या रूपात उभ्या होत्या. सध्या सुरू असलेल्या पोषण मासाच्या अनुषंगाने तालुक्यात असे विविध उपक्रम राबविण्यात आले आहेत.
एकात्मिक बालविकास विभागाच्या अखत्यारित येणाऱ्या अंगणवाडीमध्ये कार्यरत असलेल्या अंगणवाडी सेविका, मदतनीस यांनी यंदाचा महालक्ष्मी सण साजरा करताना विविध नवोपक्रम राबवले आहेत. शिक्षण घेतलेली मुलगी ही खऱ्या अर्थाने २१ व्या शतकातील लक्ष्मीच आहे. याशिवाय बालक व मुलीच्या शिक्षण, आरोग्य, आहारासंबंधी जाणीवजागृती होणे गरजेच आहे. या उद्देशाने असे उपक्रम राबवण्यात आले आहेत.
यात डिकसळ येथील अंगणवाडी क्रमांक ११७ मध्ये कार्यरत असलेल्या अंगणवाडीसेविका आशा जाधव व मदतनीस खंदारे यांनी आपल्या अंगणवाडीत प्रतीकात्मक स्वरूपात दोन विद्यार्थिनींंना महालक्ष्मी स्वरूपात उभे करून गौरी गणपतीचा सण साजरा केला. या वेळी समृद्धी जाधव व समीक्षा जाधव या दोन विद्यार्थिनींंच्या हातात विद्येचे प्रतीक असलेले पुस्तक देण्यात आले होते. याशिवाय इतरही अंगणवाडी कर्मचाऱ्यांनी असे विविध उपक्रम राबवले असल्याचे प्रकल्प अधिकारी वैशाली सांगळे यांनी सांगितले. ईटकूर येथील अंगणवाडीमध्ये बालकांचे पोषण, कुपोषण, आहार, आरोग्याची काळजी घेणारे संदेश महालक्ष्मीच्या आरासात मांडण्यात आले होते.
चौकट....
इतर गावांंतही जनजागृतीवर भर...
महिला व बालविकास विभाग सध्या पोषण माह राबवत आहे. यानुसार महालक्ष्मी सणाचे औचित्य साधून तालुक्यातील ईटकूर येथील अंगणवाडी क्रमांक १०४ च्या अंगणवाडी सेविका कस्तुरा अस्वले, अंगणवाडी क्रमांक ४०८ च्या संगीता फरताडे, आढळा येथील शाहू कोकणे, केरूबाई वायसे आदींनी महालक्ष्मी आरासात बेटी पढाओ, बेटी बचाओ, कुपोषण मुक्ती, सकस आहार यासंदर्भातील जनजागृती करणारी सजावट केली आहे.