सावरगाव प्राथमिक आरोग्य केंद्रासमोरील मैदानात अनेक वर्षांपासून १५ कुटुंबे पाल ठोकून वास्तव्य करीत आहेत. या भागातील गावांत भटकंती करून महिला चाळण्या, टोपली विकतात, तर पुरुष भंगार गोळा करून आपल्या कुटुंबाचा उदरनिर्वाह चालवितात. भटकंतीवरच या १५ कुटुंबीयांच्या रोजीरोटीचा प्रश्न अवलंबून आहे. याबाबतचे वृत ‘लोकमत’ने प्रसिद्ध केले होते. याची दखल घेत या भटक्या कुटुंबीयांच्या मदतीसाठी तामलवाडी पोलीस ठाण्यातील खाकी वर्दीतला दानशूरपणा जागा झाला. सपोनि सचिन पंडित यांनी मदत करण्यासंबंधीची इच्छा सावरगावचे सरपंच रामेश्वर तोडकरी यांना बोलून दाखविली. तसेच याबाबत नियोजन करण्यात आले. सरपंच तोडकरी यांनी या कुटुंबांची नावे, कुटुंबनिहाय संख्या याची माहिती घेतली. त्यानुसार, सोमवारी सपोनि सचिन पंडित व सरपंच रामेश्वर तोडकरी यांच्या हस्ते या कुटुंबीयांना किराणा सामान, अन्नधान्य किटचे वाटप करण्यात आले.
यावेळी जि.प. सदस्य राजकुमार पाटील, सचिन पंडित, सरपंच रामेश्वर तोडकरी, उपसरपंच आनंद बोबडे, पोलीस पाटील समाधान डोके, शंकर शिंदे, भागवत डोलारे, परमेश्वर काळदाते, नेताजी कदम, सुरज ढेकणे, बाळासाहेब डोके, महेश गवळी, राजकुमार बोबडे, राजाभाऊ ठाकूर, दादा काडगावकर यांच्यासह ग्रामस्थ उपस्थित होते.
चौकट
‘लोकमत’च्या वृत्ताने ‘त्या’ कुटुंबांना मिळाली मदत
सावरगाव येथे निवासी असलेल्या १५ कुटुंबीयांच्या उदरनिर्वाहाचा प्रश्न लाॅकडाऊनमुळे गेल्या महिनाभरापासून गंभीर बनला होता. याबाबतचे वृत्त ‘लोकमत’ने प्रसिद्ध केले होते. त्यामुळे आम्हाला मदत करण्याची इच्छा झाली. त्यानुसार, सोमवारी या १५ भटक्या कुटुंबीयांना अन्नधान्याची मदत केली.
- रामेश्वर तोडकरी,
सरपंच, सावरगाव