तेर : कोरोना विषाणूचा संसर्ग रोखण्यासाठी देशातील १८ ते ४४ वयोगटातील नागरिकांना कोरोना प्रतिबंधक लसीकरण करण्यासाठी ऑनलाइन पध्दतीने नोंदणी करण्याचा निर्णय घेतला आहे. यामध्ये शहरी भागातील नागरिक मोबाइलद्वारे नोंदणी करतात. परंतु, पुरेशा ज्ञानाअभावी ग्रामीण भागातील नागरिक मोबाइलवरून नोंदणी करू शकत नाही. परिणामी लसीकरणासाठी शहरी भागातील नागरिक ग्रामीण भागाकडे वळले आहेत. यामुळे ग्रामीण भागातील नागरिक लसीकरणापासून वंचित राहण्याची भीती व्यक्त होत आहे.
जिल्ह्यात कोरोना रुग्णसंख्येत दिवसेंदिवस वाढ होत आहे. शिवाय मृत्यूचे प्रमाणही वाढले आहे. यातच ग्रामीण भागातही कोरोना विषाणूचा मोठ्या प्रमाणात प्रादुर्भाव वाढला आहे. वाढत्या रुग्णसंख्येच्या पार्श्वभूमीवर केंद्र व राज्य सरकारने कोरोना प्रतिबंधक लसीकरण सुरू केले आहे. यासाठी शासनाच्या वेबसाइडवर ऑनलाइन नोंदणी करणे आवश्यक आहे. यासाठी उस्मानाबाद तालुक्यातील तेर येथील ग्रामीण रुग्णालयाचे स्लाँट १० व ११ मे या दोन दिवसांचे बुक झाले आहेत. लसीकरणाची पद्धत ऑनलाइन केल्यामुळे शहरी भागातील नागरिक मोबाइलवर नोंदणी करतात. परंतु, पुरेसे ज्ञान नसल्याने खेड्यातील नागरिक ऑनलाइन करू शकले नाहीत. काही तरुण ऑनलाइन नोंदणी करण्यासाठी धावपळ करीत होते. मात्र, लसीकरणासाठीची साइड ओपन होत नसल्याने त्यांना रिकाम्या हाताने परतावे लागले.
१० मे रोजी तेर येथील ग्रामीण रुग्णालयात २५० लाभार्थींना कोव्हॅक्सिनचा डोस देण्यात आला. त्यामध्ये तेर येथील केवळ २० जणांचा समावेश आहे, तर उर्वरित लाभार्थी उस्मानाबाद शहरासह औरंगाबाद, मुरूड, लातूर, भोसा येथील होते.
परजिल्ह्यातील नागरिकांची लसीकरणासाठी ग्रामीण भागात मोठ्या प्रमाणात गर्दी होत आहे. त्यामुळे खेड्यातील नागरिक कोरोना प्रतिबंधक लसीकरणापासून वंचित राहण्याची शक्यता निर्माण झाली आहे.
(चाैकट)
ई-पासच्या आदेशाचे उल्लंघन?
वाढत्या कोरोना रुग्णसंख्येमुळे शासनाने परजिल्ह्यात जाण्यासाठी नागरिकांना ई-पास आवश्यक केला आहे. त्यानुसार सध्या परजिल्ह्यात प्रवेश करण्यासाठी नागरिकांना ई-पास काढून प्रवेश दिला जात आहे. मात्र, कोरोना प्रतिबंधक लसीकरण करण्यासाठी तेर येथील ग्रामीण रुग्णालयात परजिल्ह्यातील नागरिक आले होते. त्यांनी ई-पास काढून प्रवेश केला का, हेदेखील तपासणी करणे आवश्यक आहे.