मुंबई : स्फोटक कारप्रकरणी अटकेत असलेला निलंबित पोलीस अधिकारी सचिन वाझे याच्या कार्यालयातून राष्ट्रीय तपास यंत्रणेने (एनआयए) एक डायरी जप्त केली आहे. २०० पानांच्या या डायरीतून त्याचे आर्थिक व्यवहार व वसुलीचे रॅकेट उघडकीस येण्याची शक्यता आहे. डायरीत पब्ज, बार, बुकी आणि इतर महत्त्वाच्या कारवायांचा उल्लेख आहे. कोडवर्डमध्ये वसुलीबद्दल तपशील नमूद असल्याचे अधिकऱ्यांनी सांगितले.
उद्योगपती मुकेश अंबानी यांच्या निवासस्थानापासून जवळ सापडलेल्या स्फोटक कारप्रकरणी एनआयएने सीआययूचा प्रमुख सचिन वाझेला १३ मार्चला अटक केली. त्यानंतर पोलीस मुख्यालयातील कार्यालयाची झडती घेऊन संगणक, आयपॉडसह अनेक साहित्य जप्त केले. त्यामध्ये ही डायरी त्यांच्या हाती लागली. कुणाला किती पैसे जात होते, याचा हिशेब वाझे ठेवत होता.
या डायरीत मुंबईतील सर्व बार, पब आणि हुक्कापार्लरची यादीही आहे. ज्यांनी पैसे दिले त्याची नोंद असल्याचेही समाेर आले आहे. लाखाच्या नोंदीसाठी एल, तर हजाराच्या नोंदीसाठी के अक्षर वापरले आहे. बार, पब, हुक्का पार्लर यांची येणारी रक्कम आणि दिलेली रक्कमही लिहिली आहे. पैशांचे वाटप नियमित होत होते. त्याबाबतही कोड भाषेत नोंद आहे.
वाझेच्या अटकेनंतर एनआयएने पाच आलिशान गाड्या, साडेपाच लाखांची रोकड, पैसे मोजण्याची मशीन जप्त केली. तसेच त्यांच्या हाती संशयित डायरीही लागली आहे. त्यातून वाझेेने केलेल्या आर्थिक उलाढाली स्पष्ट होत असल्यामुळे, आता या प्रकरणाचा अधिक तपास हा सक्तवसुली संचालनालयाकडूनही (ईडी) करण्यात येईल, अशी शक्यता आहे.
पुण्यातील फॉरेन्सिककडून जप्त गाड्यांची तपासणीजिलेटीनच्या कांड्या असलेल्या स्कॉर्पिओची मंगळवारी पुण्यातील फॉरेन्सिक पथकाने तपासणी केली. या कारसह जप्त केलेल्या पाचही गाड्यांचा फॉरेन्सिक अहवाल नव्याने तयार करण्यात येईल.एनआयएच्या अटकेत असलेल्या सचिन वाझेची एनआयए कोठडीची मुदत २५ मार्चला संपत आहे. त्यानंतर मनसुख हिरेनच्या हत्येप्रकरणी प्रमुख संशयित आरोपी असलेल्या वाझेला एटीएस अटक करणार आहे. त्याला ताब्यात घेण्यासाठी एटीएसने न्यायालयातून वाॅरंट मिळविले आहे. त्यामुळे त्याचा ताबा जाण्यापूर्वी सर्व तांत्रिक पुरावे जमवत आहेत. त्यासाठी पुण्यातील फॉरेन्सिक तंत्रज्ञांना बाेलावण्यात आले होते.
हुक्का पार्लरमधून ११ कोटींची वसुलीसचिन वाझेकडे वसुलीचे काम होते, ती तो रक्कम कोणाला देत होता, याबद्दल अद्याप स्पष्ट झालेले नाही. मात्र मुंबईतील हुक्का पार्लरमधून ११ कोटींची वसुली केल्याचे डायरीत नमूद असल्याचे समजते.