बसमधून खाली पडल्याने महिला जखमी

बीड: शहरातील नाळवंडी नाक्यावर बसमधून उतरताना एक मजूर महिला पडून गंभीर जखमी झाल्याची घटना गुरुवारी रात्री साडेनऊच्या सुमारास घडली होती. यामुळे शुक्रवारी सकाळी शहर बस कार्यालयासमोर जमाव झाल्याने शुक्रवारी बससेवा बंद ठेवण्यात आली होती. शहर बससेवा सुरु करण्यात आलेली आहे. गुरुवारी रात्री साडेनऊच्या सुमारास शहर बस प्रवाशांना सोडण्यासाठी गेली होती. त्यामध्ये तीन प्रवाशी होते. महिला प्रवाशी हौसाबाई शिवाजी माने या बसमधून उतरत असताना खाली पडल्या. बस थांबली की नाही? याचा त्यांना अंदाज आला नसल्यामुळे त्या खाली उतरू लागल्या व पडल्या. या अपघातात त्यांच्या हाताला व डोक्याला गंभीर इजा झाली. त्यामुळे त्यांना त्याच गाडीतून जिल्हा रुग्णालयात उपचारासाठी दाखल करण्यात आले. या घटनेची माहिती त्यांच्या नातेवाईकांना समजताच त्यांनी शुक्रवारी सकाळी शहर बस वाहतूक कार्यालयासमोर याचा जाब विचारण्यासाठी जमा झाले. यामुळे सकाळी कामावर आलेले बस ड्रायव्हर व वाहक भयभीत झाले. त्यामुळे त्यांनी कामावर जाण्यास नकार दिला. त्यामुळे शुक्रवारी बससेवा ठप्प झाली होती. महिलेची तब्येत गंभीर झाल्यामुळे तिला पुढील उपचारासाठी औरंगाबादला हलविले असल्याची माहिती जिल्हा रुग्णालय परिसरातील चौकी पोलिसांनी दिली. शहरातील आॅटो चालकांनी नाळवंडी, बालेपीर आदी भागात जाण्यासाठी प्रत्येकी १० रु. आकारले असल्याची माहिती सूत्रांनी दिली. (प्रतिनिधी)