घाटी रुग्णालय ‘आॅक्सिजन सिलिंडर’वर

घाटी रुग्णालयात अत्याधुनिक आॅक्सिजन यंत्रणा (सेंट्रल आॅक्सिजन) बसविण्यात आली आहे; परंतु ही यंत्रणा अवघ्या काही वॉर्डांपुरती मर्यादित आहे. इतर अनेक वॉर्डांत रुग्णास आॅक्सिजनची आवश्यकता भासल्यावर धावपळ करून आॅक्सिजन सिलिंडर लावला जातो

लोकमत न्यूज नेटवर्कऔरंगाबाद : घाटी रुग्णालयात अत्याधुनिक आॅक्सिजन यंत्रणा (सेंट्रल आॅक्सिजन) बसविण्यात आली आहे; परंतु ही यंत्रणा अवघ्या काही वॉर्डांपुरती मर्यादित आहे. इतर अनेक वॉर्डांत रुग्णास आॅक्सिजनची आवश्यकता भासल्यावर धावपळ करून आॅक्सिजन सिलिंडर लावला जातो. बालकक्षही सिलिंडरच्या जोरावर सुरू आहे. अनेकदा सिलिंडर पोहोचण्यास विलंब होतो. हा प्रकार रुग्णांच्या जिवावर बेतण्याचा धोका असल्यामुळे आॅक्सिजनच्या सुविधेत वाढ होण्याची आवश्यकता आहे.घाटीतील मेडिसिन विभागात सेंट्रल आॅक्सिजन सिस्टिम आहे. येथे एका टँकमधून अतिदक्षता व आयसीसीयू, ‘एमआयसीयू’ला आॅक्सिजन पुरवठा केला जातो. सर्जिकल इमारतीमधील आॅपरेशन थिएटरमध्ये आॅक्सिजन पुरवठा करण्यासाठी एक टँक आहे. या दोन्ही टँकमध्ये लिक्विड आॅक्सिजनचा पुरवठा केला जातो. तेथून पाईपद्वारे रुग्णांना आॅक्सिजन पुरविला जातो.या यंत्रणेत बिघाड झाल्यास जम्बो सिलिंडर उपलब्ध असतात; परंतु याच जम्बो सिलिंडरच्या जोरावर इतर वॉर्डांतील रुग्णांना आॅक्सिजन मिळत आहे. अपघात विभागाच्या मुख्य इमारतीमध्ये असलेल्या शल्यचिकित्सा अतिदक्षता विभागातील रुग्णांना आॅक्सिजन पुरवठा करण्यासाठी सेंट्रल आॅक्सिजन सिस्टिम आहे; परंतु यासाठीही जम्बो सिलिंडरचा वापर करण्याची वेळ येत आहे. जम्बो सिलिंडर लावून या विभागात पाइपद्वारे आॅक्सिजन दिले जाते. वारंवार सिलिंडर लावण्याची कसरत कर्मचाºयांना करावी लागते. थेट लिक्विड आॅक्सिजनच्या टँकमधून पुरवठा झाल्यास ही कसरत कमी होईल, अशी अपेक्षा कर्मचाºयांकडून व्यक्त होत आहे.