औरंगाबाद : न्यूमोनियामुळे होणारे बालकांचे मृत्यू रोखण्यासाठी महापालिकेतर्फे १२ जुलैपासून प्रत्येक नवजात शिशूला न्यूमोनियाविरोधी लस (न्यूमोकोक्कल काँज्युगेट व्हॅक्सिन- पीव्हीसी) देण्याचा निर्णय घेतला आहे.
लहान मुलांमध्ये न्यूमोनिया होण्याचे प्रमाण अधिक असते. यामुळे अनेकदा योग्य उपचार न मिळाल्यामुळे मृत्यूही होतो. न्यूमोनियामुळे होणारे मृत्यूचे सत्र रोखण्यासाठी राज्य सरकारने ठोस पाऊल उचलले आहे. प्रत्येक नवजात शिशूला अत्यंत महागडी लस देण्याचा निर्णय घेण्यात आला आहे. राज्यातील प्रत्येक शासकीय रुग्णालयांना लसही उपलब्ध करून देण्यात आली आहे.
नवजात शिशूंमध्ये रोगप्रतिकारशक्ती अत्यंत कमी असते. त्यामुळे अनेकदा ‘स्ट्रेप्टोकोकस न्यूमोनिया बॅक्टेरिया’ची लागण होते. या बॅक्टेरियाचा खात्मा करण्यासाठी बाजारात ५ हजार रुपये किमतीची ‘न्यूमोकोकल’ व्हॅक्सिन उपलब्ध आहे. अनेक खाजगी डॉक्टर याचा मोठ्या प्रमाणात वापरही करतात. सर्वसामान्य गोरगरीब नागरिकांच्या मुलांना ही लस उपलब्ध होत नाही. शासकीय कार्यालयांमध्ये अनेकदा उपलब्ध औषधींचा डॉक्टरांकडून वापर होतो. प्रत्येक नवजात शिशूला न्यूमोनिया होऊ नये म्हणून लसीचे तीन डोस देण्याचा निर्णय शासनाने घेतला आहे. राज्यातील प्रत्येक शासकीय रुग्णालयांना यासंदर्भात निर्देश आणि लसीचा साठाही उपलब्ध करून देण्यात आला आहे. औरंगाबाद महापालिकेला दोन हजार लसींचा साठा शासनाकडून प्राप्त झाला असून, १२ जुलैपासून प्रत्येक नवजात शिशूला लस देण्याचे नियोजन आरोग्य विभागाकडून करण्यात येत आहे. लहान मुलांमध्ये न्यूमोनिया होण्याचे प्रमाण १२ टक्के आहे. हे प्रमाण शून्यावर आणण्यासाठी केंद्र आणि राज्य शासनाने व्यापक प्रमाणात उपाययोजना सुरू केल्याची माहिती आरोग्य वैद्यकीय अधिकारी डॉ. नीता पाडळकर यांनी दिली. लसीकरण मोहीम सुरू झाल्यानंतर दीड महिन्याचा शिशू असेल तरच लस दिली जाईल. यापुढे जन्म घेतलेल्या शिशूला लस देण्यासाठी प्रयत्न करण्यात येणार असल्याचे त्यांनी नमूद केले. साधारणपणे औरंगाबाद शहरात दरवर्षी २० हजार बालके जन्माला येत असतील, तर त्यादृष्टीने लसीचे नियोजन राहणार आहे.
चौकट..
लहान मुलांमध्ये न्यूमोनिया होण्याचे प्रमाण १२ टक्के
दरवर्षी २० हजार बालकांच्या लसींचे नियोजन
दोन हजार लसींचा साठा महापालिकेला शासनाकडून प्राप्त
चौकट...
असे होईल लसीकरण
दीड महिना- पहिला डोस
तीन महिने- दुसरा डोस
नऊ महिने- तिसरा डोस