फुलंब्री : तालुक्यातील औरंगाबाद-जळगाव महामार्गावर मौला अली दर्ग्याजवळ रस्त्याचे काम सुरू असलेल्या ठिकाणी दोन ट्रक एकाच वेळी थांबल्याने तासभर वाहतूक ठप्प झाली होती. यामुळे प्रवाशांना हकनाक त्रास सहन करावा लागला.
औरंगाबाद - जळगाव या राष्ट्रीय महामार्गावरील मौला अली दर्ग्याजवळ एका बाजूने सिमेंट रस्त्याचे काम सुरू आहे. यावेळी रस्त्याच्या दुसऱ्या बाजूने एक मालवाहतूक ट्रक व दुसरा उसाने भरलेला ट्रक एकाच वेळी अरुंद रस्त्यावर येऊन थांबले. रस्ता खराब असल्याने त्यांना जाणे अवघड झाले. परिणामी दोन्ही बाजूने येणाऱ्या वाहनांच्या २ कि.मी.पर्यंत रांगा लागल्या होत्या. याची माहिती मिळाल्यानंतर फुलंब्री पोलीस स्टेशनचे कमर्चारी घटनास्थळी धावले. त्यांनी वाहतूक सुरळीत केल्यानंतर वाहने रवाना झाली.
फोटो कॅप्शन : फुलंबी ते औरंगाबाद मार्गावर मौला अली दर्ग्याजवळ वाहतूक ठप्प झाली होती.