दोन माजी नगराध्यक्षांसह सीईओंविरूद्ध गुन्हा दाखल

परभणी : एकात्मिक गृहनिर्माण झोपडपट्टी सुधार योजनेचा डीपीआर (डिलिट प्रोजेक्ट रिपोर्ट) तयार करण्यासाठी शासन निकषापेक्षा ९४ लाख रुपये अधिक देऊन शासकीय रक्कमेचा अपहार केल्याप्रकरणी मोंढा पोलिस ठाण्यात न्यायालयाच्या आदेशानुसार गुन्हा दाखल झाला आहे़ परभणी ऩ प़ चे तत्कालीन नगराध्यक्ष प्रताप देशमुख, तत्कालीन नगराध्यक्षा जयश्रीताई खोबे, तत्कालीन मुख्याधिकारी बी़ व्ही़ निलावाड, कोंडिबा नरसू कुंभार यांच्याविरूद्ध हा गुन्हा दाखल झाला आहे़ या योजनेचा संपूर्ण अहवाल तयार करण्यासाठी आर्क असोसिएशन या कंपनीशी तत्कालीन नगराध्यक्ष प्रताप देशमुख व मुख्याधिकारी कोंडिबा नरसू कुंभार यांनी करार केला होता़ या कंपनीचे लक्ष्मीकांत सुर्वे व स्वप्निल श्रॉफ हे दोघे तथाकथित संचालक आहेत़ शासनाच्या नियमानुसार एकूण प्रकल्पाच्या १ टक्का किंवा जास्तीत जास्त ४० लाख रुपये शुल्क अहवाल तयार करण्यासाठी देण्याचे निर्देश आहेत़ हा करार झाल्यानंतर दुसऱ्या टर्ममध्ये २००९ मध्ये जयश्रीताई खोबे या नगराध्यक्षा झाल्या़ खोबे आणि तत्कालीन मुख्याधिकारी बी़ व्ही़ निलावाड यांनी या कंपनीस शासनाचे निर्देश न पाळता १ कोटी ३४ लाख रुपये म्हणजे ९४ लाख रुपये अधिक दिल्या गेले़ याप्रकरणी विजया मंकय्या कारंगलू यांनी माहिती घेतली आणि अ‍ॅड़ अविनाश चौधरी यांच्यामार्फत परभणी येथील न्यायालयात खटला दाखल झाला़ युक्तिवादानंतर न्यायालयाने संबंधिताविरूद्ध गुन्हे दाखल करण्याचे आदेश पारित केले होते़ त्यानुसार नवा मोंढा पोलिस ठाण्यात हा गुन्हा दाखल झाला असून, चौकशी करून पोलिस न्यायालयास अहवाल सादर करतील़ (प्रतिनिधी)