‘बीएचआर’च्या तिघांना कोठडी

उस्मानाबाद : ग्राहकांची फसवणूक केल्याप्रकरणी अटकेत असलेल्या दोन संचालकांच्या पोलीस कोठडीत न्यायालयाने सोमवारी वाढ करण्यात आली असून, अटकेत असलेल्या शाखा व्यवस्थापकालाही पोलीस कोठडी सुनावण्यात आली आहे़ तर दहा जणांना न्यायालयीन कोठडी सुनावण्यात आली असून, त्यांची जळगाव कारागृहात रवानगी करण्यात आली आहे़शहरातील वैद्यकीय व्यवसाय करणारे डॉ़ पालकर यांनी गुंतवणुकीची मुदत संपल्यानंतरही पैसे परत मिळत नसल्याने आपली फसवणूक झाल्याची फिर्याद शहर पोलीस ठाण्यात दिली होती़ डॉ़ पालकर यांच्या फिर्यादीवरून शहर पोलीस ठाण्यात गुन्हा दाखल करण्यात आला होता़ शहर पोलिसांनी मागील आठवड्यात सर्व संचालकांना अटक करून न्यायालयात हजर केले होते़ त्यांना ३० मार्च पर्यंत पोलीस कोठडी सुनावण्यात आली होती़ तर उस्मानाबाद येथील शाखा व्यवस्थापक कोळेकर याला रविवारी अटक करण्यात आली होती़ त्यानंतर शहर पोलीस ठाण्यात जवळपास २५ ते ३० जणांनी आपली फसवणूक झाल्याच्या तक्रारी दिल्या आहेत़ अटकेतील संचालकांसह शाखा व्यवस्थापकास सोमवारी न्यायालयात हजर करण्यात आले होते़ यातील प्रमोद रासयोनी, दिलीप चोरडिया या दोघांसह शाखा व्यवस्थापक कोळेकर याना २ एप्रिल पर्यंत पोलीस कोठडी सुनावण्यात आली आहे़ तर इतरांना न्यायालयीन कोठडी सुनावण्यात आली आहे़