औरंगाबाद : शहरात मोटारसायकल चोरीचे सत्र थांबायचे नाव घेत नाही. अलीकडे शहरातून चार मोटारसायकली व एक कार चोरी झाल्याच्या घटना समोर आल्या आहेत. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
आग्रेल जोसेफ शिणगारे (५२, रा. नंदनवन कॉलनी) यांनी ९ जानेवार रोजी रात्री आपली दुचाकी (एमएच-२० बीएम-९१६५) नंदनवन कॉलनीतील गणशिवगौरी अपार्टमेंटच्या पार्किंगमध्ये उभी केली होती. ती अज्ञात चोरट्याने चोरून नेली. याप्रकरणी छावणी पोलीस ठाण्यात गुन्हा दाखल करण्यात आला आहे. परमेश्वर एकनाथ चव्हाण (३१, रा. सूतगिरणी परिसर, म्हाडा क्वॉर्टर्स, गारखेडा) हे मुकुंदवाडीतील जय बालाजी हॉटेलमध्ये मित्राचा वाढदिवस साजरा करण्यासाठी गेले होते. त्यांनी हॉटेलसमोर आपली दुचाकी (एमएच-२० ईआर-२७७५) उभी करून ठेवली होती. ती २ जानेवारी रोजी सायंकाळी ७.३० ते ९.३० वाजेदरम्यान चोरीला गेली. याप्रकरणी मुकुंदवाडी ठाण्यात गुन्हा दाखल करण्यात आला आहे. ६ जानेवारी रोजी यारखान सईद हबीब यारखान (५०, रा. मिल कॉर्नर, कोतवालपुरा) यांचे गॅरेज आहे. त्यांनी रात्री ११.३० वाजेच्या सुमारास आपल्या घरासमोर दुचाकी (एमएच-२० डीएल-०९७८) उभी केली होती. चोरट्याने हँडल लॉक तोडून दुचाकी चोरून नेली. याप्रकरणी बेगमपुरा ठाण्यात तक्रार दाखल करण्यात आली आहे. संदीप विश्वनाथ महाजन (४८, रा. एन-७ सिडको) यांनी ९ जानेवारी रोजी रात्री ८ वाजेच्या सुमारास घरासमोर उभी करून ठेवलेली दुचाकी (एमएच-२० डीजी-७९१४) चोरट्याने चोरून नेली.
चौकट.....
काच फोडून कारचा दरवाजा उघडला
सत्यमनगर, एन-५ सिडको येथील रहिवासी राहुल विकास देशमुख (३६) यांनी ८ जानेवारी रोजी घरासमोर कार (एमएच-२० डीजे-४२७०) उभी केली होती. अज्ञात चोरट्यांनी कारची काच फोडून दरवाजा उघडला व आत प्रवेश करून ती चोरून नेली. त्यांनी शहरात कारचा शोध घेतला; पण ती कुठेही आढळून आली नाही. याप्रकरणी सिडको पोलीस ठाण्यात गुन्हे दाखल करण्यात आला आहे.