क्रीडा प्रशिक्षणांचाही पडला ‘दुष्काळ’ !

महेश पाळणे, लातूरउन्हाळ्याच्या सुट्या म्हटल्या की, क्रीडा प्रशिक्षणांचा मोसम. विविध खेळांच्या क्रीडा प्रशिक्षणांची रेलचेल या दरम्यान असते. त्यातच शासनाच्या कृपेवरून खेळाच्या संख्येने शंभरीच्या वर संख्या गाठली आहे. मात्र लातूर शहरात व जिल्ह्यात मोजक्याच खेळांच्या संघटना उन्हाळी प्रशिक्षण शिबिराचे आयोजन करीत आहेत. त्यामुळे भर दुष्काळातही क्रीडा प्रशिक्षणांचा दुष्काळ क्रीडा क्षेत्राला जाणवत आहे. क्रीडा संघटना व क्रीडा कार्यालयामार्फत उन्हाळ्यात जास्त कालावधीचे प्रशिक्षण शिबीर घेण्यात येतात. उन्हाळी प्रशिक्षण शिबिराच्या माध्यमातूनच खेळाडूंच्या कौशल्याचा विकास होतो. त्यांच्यातील आत्मविश्वास व अचूकताही यातूनच वाढते. उत्तम खेळाडू तयार करायचे असल्यास यासारख्या शिबिरांची आवश्यकता असते. शारीरिक क्षमता, सांघिक भावनाही यातून वृद्धिंगत होते. शहरातील व जिल्ह्यातील चित्र पाहता दहा ते बारा खेळांच्या माध्यमातूनच या शिबिराचे आयोजन आहे. त्यातील क्रीडा कार्यालयामार्फत चार, संघटनेमार्फत अवघ्या तीन तर उर्वरित प्रशिक्षणात विविध खाजगी क्रीडा मंडळे व क्लबचीच संख्या आहे. त्यामुळे क्रीडा संघटनेच्या मुख्य उद्देशाला हुलकावणी मिळाली आहे. केवळ संघ पाठविणे व स्पर्धा घेणे यावरच जिल्ह्यातील काही क्रीडा संघटनांचा रस दिसतो. यामुळे खेळाडू घडविण्याच्या मुख्य उद्देशाला बगल मिळत आहे.