मुजीब देवणीकर
औरंगाबाद : शहरातील मुख्य बाजारपेठेसह प्रमुख रस्त्यांवर सार्वजनिक स्वच्छतागृहांची वानवा आहे. त्यामुळे बाजारात खरेदीसाठी येणाऱ्या महिलांसह नागरिकांची मोठी कुचंबणा होते. ही बाब लक्षात घेऊन १०० ठिकाणी सार्वजनिक स्वच्छतागृह सुरू करण्याचे आदेश महापालिकेचे प्रशासक आस्तिककुमार पांडेय यांनी फेब्रुवारी महिन्यात अधिकाऱ्यांना दिले. प्लास्टिकचे शौचालय खरेदी करण्याची प्रक्रिया आता अंतिम टप्प्यात पोहोचली आहे. लवकरच या ठिकाणी प्लास्टिकची शौचालये उभारण्यात येणार आहेत.
५० स्वच्छतागृह महिलांसाठी, तर ५० पुरुषांसाठी असतील, असे जाहीर करण्यात आले होते. या कामात महापालिकेकडून अत्यंत संथगतीने काम सुरू आहे. शहरातील सार्वजनिक स्वच्छतागृहांचा विषय गेल्या अनेक वर्षांपासून गाजत आहे. मुख्य बाजारपेठ असलेल्या औरंगपुरा, गुलमंडी, सराफा, शहागंज, निराला बाजार येथे सार्वजनिक स्वच्छतागृह असले तरी यातील काही स्वच्छतागृहांची पडझड झाली आहे. काही स्वच्छतागृह देखभाल दुरुस्तीअभावी बंद आहेत. त्यामुळे महापालिकेच्या सर्वसाधारण सभा व स्थायी समितीच्या बैठकीत नगरसेवकांनी याविषयी वारंवार आवाज उठवला होता. सुलभ तसेच शासनाच्या स्वच्छता अभियानांतर्गत शहरात सार्वजनिक स्वच्छतागृह उभारण्याची वारंवार घोषणाही झाली. मात्र, अद्याप बोटावर मोजण्याएवढीच स्वच्छतागृह शहरात आहेत. त्यामुळे महापालिकेचे प्रशासक आस्तिककुमार पांडेय यांनी शहरात १०० ठिकाणी सार्वजनिक स्वच्छतागृह सुरू करण्याचा निर्णय घेतला आहे. फायबरपासून तयार केलेली ही स्वच्छतागृह असतील. त्यामुळे जागा कमी लागणार असून, किंमतही कमी असेल. ५० महिलांसाठी, तर ५० पुरुषांसाठी स्वच्छतागृह उभारण्यासंदर्भात अंदाजपत्रक तयार करण्याचे आदेश देण्यात आले होते. मात्र, चार महिने उलटले तरी या कामात प्रशासनाकडून कोणतीही प्रगती दिसून येत नाही. या कामासाठी स्मार्ट सिटी योजनेतून निधी घेण्याचे निश्चित झाले होते.
चौकट...
शासनाच्या पोर्टलवरून खरेदी
फायबरची बनविलेली शौचालये खरेदी करण्यासाठी शासनाच्या पोर्टलवरून निविदा मागविण्यात आली आहे. लवकरच निविदा प्रक्रिया अंतिम करून शहरात शौचालय उभारण्याचे काम करण्यात येणार आहे. यासाठी जागासुद्धा निश्चित करण्यात आल्याची माहिती घनकचरा विभागप्रमुख नंदकिशोर भोंबे यांनी दिली.