औरंगाबाद: मुकुंदवाडी पोलिसांच्या हातावर तुरी देऊन पसार झालेला आरोपी अमर गायकवाड उर्फ अमऱ्याने एक कॉल त्याच्या आईच्या मोबाईलवर केला आणि तो मनमाड रेल्वेस्थानक परिसरात असल्याचे पोलिसांना समजले. यानंतर रेल्वे सुरक्षा बल आणि लोहमार्ग पोलिसांची मदत घेऊन अवघ्या काही मिनिटात त्याला पोलिसांनी बेड्या ठोकल्या. आरोपी अमर गायकवाडला आणण्यासाठी मुकुंदवाडी पोलिसांचे पथक मनमाडला रवाना झाले.
वृध्दाला मारहाण करून त्यांच्या खिशातील पैसे हिसकावून नेल्याच्या आरोपाखाली मुकुंदवाडी पोलिसांनी आरोपी अमर भाऊसाहेब गायकवाडला ९ फेब्रुवारी रोजी रात्री अटक केली होती. पोलीस हवालदार दादा काटकर आणि कर्मचाऱ्यांनी बुधवारी दुपारी १२.३० वाजेच्या सुमारास त्याला न्यायालयात हजर करण्यासाठी मुकुंदवाडी ठाण्यात नोंद केली व पोलीस व्हॅनमध्ये बसविले. हातकडी टोचत असल्याची तक्रार त्याने केल्याने पोलीस कर्मचारी त्याच्या एका हातातील हातकडी काढून दुसऱ्या हातात घालत होते. याचवेळी पोलीस हवालदार काटकर यांच्या हाताला झटका देऊन अमर गाडीतून उडी मारून पळून गेला. तेव्हापासून पोलीस त्याचा शोध घेत होते. मात्र रात्रभर शोध घेऊनही तो पोलिसांच्या हाती लागला नव्हता. त्याच्याजवळ मोबाईल नव्हता. पोलिसांनी त्याच्या आईच्या मोबाईलवर येणाऱ्या कॉलवर नजर ठेवली होती.