म्युकरमायकोसिसचे चार रुग्ण दाखल
औरंगाबाद : शहरात म्युकरमायकोसिसच्या रुग्णांचा आकडा वाढत आहे. बुधवारी नवीन चार रुग्ण दाखल झाले मात्र एकही रुग्ण दगावला नाही. त्यामुळे नागरिकांसह आरोग्य यंत्रणेला मोठा दिलासा मिळाला. आतापर्यंत म्युकरमायकोसिसच्या रुग्णांचा आकडा १ हजार ५३ वर पोहोचला आहे.
दोन महिन्यांपासून म्युकरमायकोसिसच्या रुग्णांची संख्या वाढतच चालली आहे. शहरासह ग्रामीण व मराठवाड्यातील इतर जिल्ह्यांतून रुग्ण उपचारासाठी दाखल होत असून, त्यांच्यावर शहरातील विविध रुग्णालयांत उपचार केले जात आहेत. शहरातील रुग्णसंख्या कमी असली तरी ग्रामीण व इतर जिल्ह्यांतील रुग्णांमुळे ही संख्या वाढत आहे. प्रशासनाकडून प्राप्त झालेल्या अहवालानुसार बुधवारी एकाही रुग्णाचा मृत्यू झाला नाही. नवीन चार रुग्ण दाखल झाले. त्यामुळे रुग्णांची संख्या १ हजार ५३ इतकी झाली आहे. आतापर्यंत मृत्यूची संख्या १२८ इतकी आहे. अ‍ॅक्टिव्ह रुग्णांची संख्या २३५ आहे. आतापर्यंत ६९० जणांना सुटी देण्यात आली.