औरंगाबाद : औरंगाबाद जिल्ह्यात कोरोना लसीकरणाचा दुसरा टप्पा सुरू झाला आहे. परंतु अद्यापही छावणी आणि आरोग्य उपसंचालक कार्यालयाला कोल्ड स्टोअरेजची प्रतीक्षाच करावी लागत आहे. एकीकडे महिना उलटूनही नवे यंत्र मिळत नाही. तर दुसरीकडे जुने यंत्र बसविण्यासाठी तज्ज्ञ माणसे मिळत नसल्याची स्थिती आहे. परिणामी सध्या एकाच स्टोअरजेवर आरोग्य विभागाची मदार आहे.
शहरात आजघडीला सिडकोतील कुटुंब कल्याण प्रशिक्षण केंद्रांत वाक इन फ्रीजर आणि वाक इन कुलर आहे. या दोन्हींची क्षमता प्रत्येकी १२ क्युबिक मीटर आहे.
लस प्राप्त झाल्यानंतर येथेच साठवणूक केली जात आहे आणि येथूनच वितरण केले जात आहे. औरंगाबाद आरोग्य उपसंचालक कार्यालयाअंतर्गत औरंगाबाद, जालना, परभणी आणि हिंगोली हे चार जिल्हे आहेत. या जिल्ह्यांसह लातूर, उस्मानाबाद, नांदेड आणि बीड या चार जिल्ह्यांना औरंगाबादेतून लसींचा पुरवठा करण्याचे नियोजन करण्यात आले आहे. त्यादृष्टीने शहरातील छावणी परिसरा प्रत्येकी २० क्युबिक मीटर क्षमतेचे लस साठवणुकीचे २ युनिट (स्टोअर) तयार करण्यात येत आहे. त्यासाठी आवश्यक बांधकाम, रंगकाम करण्यात आले. प्रत्यक्षात यंत्र मिळण्याची प्रतीक्षाच करावी लागत आहे. हे यंत्र दिल्लीहून प्राप्त होणार आहे. परंतु यंत्राकडे डोळे लावून बसण्याचीच वेळ येत आहे.
त्याबरोबर आरोग्य उपसंचालक कार्यालयाच्या तळमजल्यात १६ क्युबिक मीटर क्षमतेचे स्टोअरेज करण्यात येत आहे. त्यासाठी जुने यंत्र आणि अत्यावश्यक साहित्यही उपलब्ध आहे. परंतु हे यंत्र बसविण्यासाठी माणसे मिळत नसल्याची परिस्थिती आहे. त्यामुळे सध्या केवळ या स्टोअरजेचा केवळ सांगाडा उभा आहे.
लवकरच काम पूर्ण
दिल्लीहून लवकरच नवे यंत्र प्राप्त होणार आहे, तर आरोग्य उपसंचालक कार्यालयातील यंत्रही लवकरच कार्यान्वित होईल. पुढील टप्प्यात अधिक लसी लागणार आहे. तोपर्यंत या दोन्ही स्टोअरचे काम पूर्ण होईल.
- डाॅ. स्वप्नील लाळे, आरोग्य उपसंचालक