ऑनलाईन लोकमत
औरंगाबाद, दि. १० : जूनी इमारत पाडून बिल्डींग मटेरियल उचलण्याच्या कारणावरुन ठेकेदाराचा खून केल्याप्रकरणी घरमालक आणि वॉचमनविरूद्ध छावणी पोलीस ठाण्यात तब्बल सव्वा वर्षानंतर हत्या आणि अ‍ॅट्रासिटीचा गुन्हा नोंदविण्यात आला.
घरमालक भास्कर क ोल्हे आणि वॉचमन संजय बागूल अशी संशयित आरोपींची नावे आहेत. याविषयी अधिक माहिती देताना छावणी विभागाचे सहायक पोलीस आयुक्त ज्ञानेश्वर मुंढे यांनी सांगितले की, २३ मे २०१६ रोजी जालिंदर त्रिभुवन यांचे प्रेत छावणीतील लष्कर परिसरात सापडले होते. तत्पूर्वी २० मे पासून ते बेपत्ता होते. पती हरवल्याची तक्रार त्यांच्या पत्नीने पोलिसांत नोंदविली होती. दरम्यान तीन दिवसाने त्यांचे प्रेत आढळल्यानंतर छावणी पोलिसांनी याप्रकरणी अकस्मात मृत्यूची नोंद करून मृताचे शवविच्छेदन केले होते. त्यावेळी त्यांच्या शरिरातील काही भाग न्यायवैद्यक प्रयोगशाळेकडे तपासणीसाठी पाठविला होता.
न्यायवैद्यक प्रयोगशाळेकडून शवविच्छेदनाचा अंतिम अहवाल नुकताच छावणी पोलिसांना प्राप्त झाला. घाटीतील शवविच्छेदन करणारे डॉक्टर आणि प्रयोगशाळेच्या अहवालानुसार मृताचा खून झाल्याचे समोर आले. ही बाब मृताच्या नातेवाईकांना कळवून त्यांचे काही म्हणने असल्याचे नोंदविण्यास सांगितले होते. तेव्हा मृताची पत्नी विजयमाला त्रिभुवन(रा. कबीरनगर, उस्मानपुरा) यांनी याविषयी छावणी पोलीस ठाण्यात ९ आॅगस्ट २०१७ रोजी खूनाची तक्रार नोंदविली. त्यांच्या तक्रारीनुसार आरोपी भास्कर क ोल्हे याच्या मालकीच्या मिटमिटा परिसरातील इमारत पाडण्याचे आणि तेथील मटेरियल उचलण्याचे कंत्राट मृत जालिंदर यांना त्यांनी तीन लाख रुपयांत दिले होते. ठरल्यानुसार मयताने इमारत पाडण्यास सुरवात केली. यावेळी इमारतीचे मटेरियल उचलण्यासाठी जालिंदर तेथे गेले असता आरोपींनी त्यांना मटेरियल उचलण्यास कोल्हे यांनी मज्जाव केला. कोल्हे यांनी त्यांना जातीवाचक शिवीगाळ करून धमकावले आणि आणखी एक लाख रुपयांची मागणी केल्याचे नमूद केले. तसेच वॉचमन बागूल यानेही त्यांना धमकावले होते.
या घटनेनंतर २० मेपासून जालिंदर बेपत्ता होते आणि २३ रोजी त्यांचे प्रेत आढळले. आरोपींनी त्यांच्या डोक्यात काहीतरी मारून हत्या केली आणि पुरावा नष्ट करण्यासाठी प्रेत छावणीतील मोकळ्या मैदानात असलेल्या लिंबाच्या झाडाखाली आणून टाकले असावे,असे तक्रारीत नमूद केले. या तक्रारीनुसार छावणी पोलीस ठाण्यात खून आणि अ‍ॅट्रासिटीचा गुन्हा नोंदविण्यात आला. या गुन्ह्याचा तपास सहायक पोलीस आयुक्त ज्ञानोबा मुंढे हे करीत आहे.