१२ विरुद्ध शून्य : सत्ताधारी गटाच्या सदस्यांचेही ठरावाच्या बाजूने मतदानकळंब/खामसवाडी : तालुक्यातील राजकीय दृष्ट्या महत्त्वाच्या असलेल्या खामसवाडी ग्रामपंचायतच्या सरपंचाविरूध्द दाखल अविश्वास ठराव शनिवारी १२ विरूध्द शून्य मतांनी मंजूर करण्यात आला़ विशेष म्हणजे शिवसेनेच्या सत्ताधारी सदस्यांनीही अविश्वास ठरावाच्या बाजूने मतदान केल्याचे दिसून आले़ मागील काही दिवसांपासून शिवसेना, राष्ट्रवादी काँग्रेसमध्ये सुरू असलेल्या शितयुध्दाचा परिपाक म्हणून अविश्वास ठरावाकडे पाहिले जात आहे़१५ सदस्य असलेली खामसवाडी ग्रामपंचायत ही कळंब तालुक्यात राजकीयदृष्ट्या महत्त्वपूर्ण असून, शिवसेनेचे पं.स. सदस्य अमोल पाटील यांच्या गटाचे १२ सदस्य असल्याने ग्रामपंचायतवर त्यांचे वर्चस्व आहे. उर्वरित तीन सदस्य त्र्यबंक शेळके यांच्या गटाचे व राष्ट्रवादीचे आहेत़ सध्या येथे सरपंच म्हणून शिवसेनेच्या शांताबाई शिवाजी शिंदे तर उपसरपंच म्हणून आनंद तापडे काम पाहत आहेत़ शिवसेनेचे अमोल पाटील व राष्ट्रवादीचे संजय पाटील यांच्या गटात मागील काही दिवसांपासून वेगवेगळ्या कारणांनी राजकीय शितयुध्द सुरू होते़ शिवाय ग्रामपंचायतीतील अंतर्गत गटामध्येही धुसफूस सुरू होती़ परिणामी ११ एप्रिल रोजी ग्रामपंचायतीच्या सदस्यांनी सरपंचांविरूध्द तहसीलदारांकडे अविश्वास ठराव दाखल केला होता़ यात सहभागी होणाऱ्या सदस्यात शिवसेनेच्या गटातून निवडून आलेल्या ९ तर राष्ट्रवादीच्या गटातील तीन सदस्यांचा समावेश होता. या ठरावावर तहसीलदार यांनी चर्चा करण्यासाठी १६ एप्रिल रोजी विशेष बैठक आयोजीत करुन सर्व सदस्यांना नोटीस दिली होती़ खामसवाडी येथील सरपंच पद अनूसूचीत जाती प्रवगार्तील महिलासाठी राखीव आहे. यामुळे ग्रांप अधिनियम १९५८ कलम ३५ (३) नुसार या प्रवर्गातील महिला सरपंचावर अविश्वास ठराव पारीत होण्यासाठी एकूण सदस्य संख्येच्या तीन चतूर्थांश यापेक्षा कमी नसेल इतके बहुमत आवश्यक असते. यामुळे अविश्वास ठराव मंजूर होईल की नाही याकडे सर्वांचे लक्ष लागले होते. अखेर तहसीलदार सुरेंद्र देशमुख यांच्या अध्यक्षतेखाली झालेल्या बैठकीत सरपंच शांताबाई शिंदे यांच्याविरूद्धच्या अविश्वास ठरावावर हात उंचावून मतदान घेण्यात आले. यावेळी अविश्वास ठरावाच्या बाजूने उपस्थीत सर्व १२ सदस्यांनी मतदान केल्याने अविश्वास ठराव मंजूर झाला. यावेळी नायब तहसीलदार दिलीप शिंदे, मंडळ अधिकारी नितीन मंडाळे, ग्रामविकास अधिकारी जी.एम.भगत, तलाठी एम. के. कांबळे, पोलीस पाटील विक्रम सुतार आदी उपस्थीत होते. (वार्ताहर) तणावपूर्ण वातावरण सरपंच शांता शिंदे यांच्याविरूद्धच्या अविश्वास ठरावाच्या बाजूने उपसरपंच आनंद तापडे, ज्ञानेश्वर बंडगर, संतोष शेळके, श्रीकृष्ण शेळके, सर्जेराव गर्जे, मिनाक्षी पाटील, सुमन कोकणे, सुनंदा पांचाळ, उज्वला शेळके, भाग्यश्री बिंदले, अनिता कदम, सिमा माळी या बारा सदस्यानी मतदान केले. तर सरपंच शांता शिंदे, सुशिलाबाई अण्णासाहेब शेळके, बाळासाहेब नारायण पाटील हे तीन सदस्य गैरहजर होते. अविश्वास ठरावामुळे गावात तणावपूर्ण वातावरण बनले होते. या पार्श्वभूमीवर सपोनी संभाजी पवार यांनी बंदोबस्त ठेवला होता.
खामसवाडी सरपंचांविरुद्ध अविश्वास ठराव मंजूर
By admin | Updated: April 16, 2016 23:54 IST