वाळूज महानगर : राज्यसभा खा. डॉ. भागवत कराड यांची केंद्रीय अर्थ राज्यमंत्रिपदी निवड झाल्याबद्दल आज, गुरुवारी बजाजनगरात भाजप पदाधिकाऱ्यांतर्फे फटाक्यांची आतषबाजी करीत पेढे वाटून जल्लोष करण्यात आला. येथील मोहटादेवी मंदिर परिसरात सायंकाळी ५.३० वाजण्याच्या सुमारास जि. प. सदस्या ज्योती चोरडिया, तालुका प्रमुख वसंत प्रधान, पंचायत समिती सदस्य सतीश पाटील, ग्रामपंचायत सदस्य अमित चोरडिया, विजय सूर्यवंशी, दादासाहेब खणसे, सुदर्शन वाघ, अंकुश पुंड, सुनीता अहिरे, मनीषा देशमुख, नंदा राजपूत, आशिष पावडे, मयूर चोरडिया, आदींनी फटाक्यांची आतषबाजी करून पेढे वाटून जल्लोष केला.
---------------------
वाळूज येथून दुचाकी लांबविली
वाळूज महानगर : वाळूज येथून दुचाकी लांबविणाऱ्या अज्ञात चोरट्याविरुद्ध गुन्हा दाखल करण्यात आला आहे. भाऊसाहेब मारुती अभंग (रा. अंजिक्यतारा सोसायटी, वाळूज) यांनी २ जुलैला रात्री दुचाकी (एम.एच.२०, बी.एच.५६१०) घरासमोर उभी केली होती. अज्ञात चोरट्याने संधी साधून ही दुचाकी चोरून नेली.
-----------------------
रांजणगावात रस्त्याचे काम सुरू
वाळूज महानगर : रांजणगाव शेणपुंजी येथील छत्रपती शिवाजी महाराज स्मारक ते कमळापूर फाटा या रस्त्याचे सिमेंटीकरणाचे काम ग्रामपंचायतीच्यावतीने सुरू करण्यात आले आहे. या रस्त्याची दयनीय अवस्था झाल्याने ये-जा करणाऱ्या वाहनधारकांना आदळ-आपटीचा त्रास सहन करावा लागत होता. दोन-तीन महिन्यांपूर्वी या रस्त्याचे एका बाजूचे काम पूर्ण झाले असून, दुसऱ्या बाजूचे काम सुरू करण्यात आल्याने वाहनधारक व नागरिकांत समाधानाचे वातावरण पसरले आहे.
------------------------
जोगेश्वरीत जि. प. शाळेलगत साचले पाणी
वाळूज महानगर : जोगेश्वरी जिल्हा परिषद शाळेलगत असलेल्या रस्त्यावर ठिकठिकाणी पावसाच्या पाण्याचे तळे साचले आहे. पावसाचे पाणी वाहून जाण्यासाठी व्यवस्था नसल्याने ठिक-ठिकाणी पावसाचे पाणी साचत असून, ये-जा करणाऱ्यांना त्रास सहन करावा लागत आहे. पावसाचे पाणी वाहून जाण्यासाठी नाल्याची व्यवस्था करण्याची मागणी त्रस्त नागरिकांकडून केली जात आहे.
-------------------